Alloh taolo osiy va gunohkor bandaga muhlat beradi. Hatto odamlar Allohning mehribonligidan hayratlanishadi. Ammo Parvardigorga nisbatan odobsizlik qilganlarning birortasi najot topganini eshitmaganmiz.
Namrudga, Fir’avnga boqing, Qorunga, Od, Samud, Lut qavmlariga nazar soling. Shunda Allohning yuqoridagi qonunini ko‘rasiz, Uning qudrati ajoyibotlarining guvohi bo‘lasiz.
Alloh taolo O‘zining mulki borasida kurashgan zolimlarni yakson qilgan. Qudratini mensimaganlarga ulug‘ligini ko‘rsatib qo‘ygan.

Nuh alayhissalom kemasidan keyin “Titanik” tarixda eng mashhur bo‘ldi. Uning yasalishini handasadagi mo‘jiza, kemasozlikdagi buyuk g‘alaba, deyishgandi. Bu kemaning uzunligi 269 metr, kengligi 28,19 metr, balandligi 18,5 metr bo‘lgan. Unda 885 ta ekipaj a’zosidan tashqari 2435 yo‘lovchi joylashishi mumkin edi.

Tarixdagi ikkinchi mashhur kema dengizdagi ilk safaridayoq g‘arq bo‘ldi. “Titanik” ilk suvga tushirilganda muxbirlar kema muhandisi Tomas Endryusga kemaning quvvati va xavfsizligi haqida savollar berishdi. Tomas Endryus bunday dedi: “Bu kema cho‘kmaydi. Uni hatto Yaratgan ham cho‘ktira olmaydi!”.
Ozgina muddatdan keyin Tomas Endryus Allohning qudratiga guvoh bo‘ldi.

Braziliya prezidenti Tankredu Nevis saylovdagi orzulari haqida gapirib: “Agar besh yuz ming ovoz to‘plasam, hatto Yaratgan ham meni prezidentlik kursisidan yiqita olmaydi!” degan edi. Nevis o‘zi aytgan ovozni to‘pladi. U xizmatga tayinlanishidan bir kun oldin bemorlikka yo‘liqdi. Bir oy o‘tib, vafot etdi. Prezidentlik kursisiga bir kun ham o‘tira olgani yo‘q!

Abdulqodir POLVONOV