1. Idishni tozalab qo‘yish.

Nubaysha ibn Amr roziyallohu anhudan rivoyat qilinadi. Rasululloh sollallohu alayhi vasallam: “Kim biror idishdan taomlanib, so‘ng uni yalab tozalab qo‘ysa, idish uning haqiga mag‘firat so‘raydi”, dedilar (Imom Termiziy rivoyati).

Anas ibn Molik roziyallohu anhudan rivoyat qilinadi. Nabiy sollallohu alayhi va sallam: «Kishi ovqat idishini yalab qo‘ysa, idish unga istig‘for aytib: “Yo Alloh! Meni shayton qo‘lidan ozod qilganing kabi uni do‘zaxdan ozod qilgin”, deydi», dedilar (“Jome’ul ahodis”).

2. Barmoqlarni yalab tozalash.

Abu Hurayra roziyallohu anhudan rivoyat qilinadi. Rasululloh sollallohu alayhi va sallam: “Qaysi biringiz taomlansa, barmoqlarini yalasin, chunki u ularning qay birida baraka borligini bilmaydi”, deganlar (Imom Termiziy rivoyati).

3. Allohga hamd aytish.

الحَمْدُ لِلَّهِ الَّذِي أطْعَمَنِي هَذَا وَرَزَقَنِيهِ مِنْ غَيْرِ حَوْلٍ مِنِّي وَلاَ قُوَّةٍ

“Alhamdulillahillaziy at’amaniy haaza rozaqniyhi min g‘oyri havlin minniy va laa quvvatin”

“Mening tarafimdan hech qanday o‘zgarish va kuch-quvvatsiz ushbuni menga yedirgan, uni menga nasib etgan Allohga hamdlar bo‘lsin”.

Rasululloh sollallohu alayhi vasallam: “Albatta, Alloh taolo banda taom yeb, Unga hamd aytganidan rozi bo‘ladi”, dedilar (Imom Muslim rivoyati).

Boshqa hadisda Rasululloh sollallohu alayhi vasallam: «Kim ovqatlanib bo‘lgach “Alhamdulillahillaziy at’amaniy haaza rozaqniyhi min g‘oyri havlin minniy va laa quvvatin” deb aytsa oldingi gunohlari kechiriladi», deganlar (Imom Termiziy, Imom Abu Dovud, Imom Ibn Moja rivoyati).

4. Qo‘llarni yuvish.

Rasululloh sollallohu alayhi vasallam dedilar: “Taomdan oldin (qo‘lni) yuvish kambag‘allikni ketkazadi. (Taomdan) so‘ng (qo‘lni yuvish) esa kichik gunohlarni ketkazadi va ko‘zni tuzatadi”.

Boshqa hadisda Rasululloh sollallohu alayhi vasallam: “Taomning barakasi undan oldin va keyin qo‘lni yuvishdadir”, deganlar (Imom Abu Dovud rivoyati).

Davron NURMUHAMMAD