BMT Bosh Assambleyasining qaroriga ko‘ra, 1997 yildan buyon 16 noyabr butun dunyoda “Xalqaro bag‘rikenglik kuni” sifatida nishonlanib kelinadi. Bu sana O‘zbekistonda ham yaxshi an’anaga aylangan. Zero, bag‘rikenglik xalqimizga xos ming yillik qadriyatimizga aylangan. U boshqa millat va din vakillariga nisbatan hurmat, xayrixohlik va muruvvat bilan munosabatda bo‘lish, insonning e’tiqodi, tili yoki irqiga qaramasdan, eng avvalo, uni insoniy qadr-qimmat bilan e’zozlash madaniyatidir.
Bugun – 10 noyabrdan boshlab “O‘zbekiston – bag‘rikeng diyor” shiori ostida “Bag‘rikenglik haftaligi” tadbirlari boshlandi. Haftalikning dastlabki tadbiri mamlakatimiz Prezidenti g‘oyasi asosida ona Vatanimiz, mard va jasur, tinchliksevar va mehnatkash xalqimiz sharafiga bunyod etilgan “Yangi O‘zbekiston” bog‘idagi Mustaqillik monumenti poyiga gulchambar qo‘yish marosimi bo‘ldi.
O‘zbekiston Respublikasi Din ishlari bo‘yicha qo‘mitasi raisining birinchi o‘rinbosari Davron Maqsudov, O‘zbekiston musulmonlari idorasi raisining birinchi o‘rinbosari Homidjon domla Ishmatbekov, milliy madaniy markazlar, do‘stlik jamiyatlari faollari, diniy konfessiya vakillari, ommaviy axborot vositalari xodimlari hamda keng jamoatchilik ishtirok etgan “Bag‘rikenglik marshi”dan so‘ng monument poyiga gullar qo‘yildi.
Shundan keyin “Yashil makon” umummilliy loyihasi doirasida turli millat va din vakillari ishtirokida “Yangi O‘zbekiston” bog‘ida daraxt ko‘chatlari ekish marosimi o‘tkazildi. Unda ishtirokchilar yaxshi niyat bilan chinor ko‘chatlarini ekishdi.
Ta’kidlash joizki, joriy yilning 10–15 noyabr kunlari mamlakatimiz bo‘ylab o‘tkazilayotgan “Bag‘rikenglik haftaligi” doirasida barcha viloyatlar va Toshkent shahridagi nufuzli san’at saroylari, teatrlar, konsert zallari, tomosha maydonlari, xiyobonlar va bog‘larda turli madaniy-ma’rifiy hamda ilmiy-amaliy bayramona tadbirlar tashkil etiladi.
O‘zbekiston musulmonlari idorasi
Matbuot xizmati
Joriy yilning 16 sentyabr kuni Qashqadaryo viloyatida «Inson qadri ulug‘langan yurtda mehr va e’tibor har bir xonadonga kirib boradi» shiori ostida xayrli tadbir o‘tkazildi.
Mazkur tashabbusga Qashqadaryo viloyati hokimi o‘rinbosari Farhod Kushakov hamda O‘zbekiston musulmonlari idorasining viloyatdagi vakili, bosh imom-xatib Rahmatillo domla Usmonov boshchilik qildi.
Tadbir doirasida shahar va tuman bosh imom-xatiblari hududlardagi ijtimoiy himoyaga muhtoj, boquvchisini yo‘qotgan va bemor fuqarolarning xonadonlariga tashrif buyurdilar.
Samimiy muloqotlar davomida fuqarolarning hol-ahvoli va ehtiyojlari o‘rganilib, ularga ma’naviy dalda berildi. Xonadon egalariga bayramona kayfiyat ulashish maqsadida oziq-ovqat mahsulotlari, ehson va sovg‘a-salomlar topshirildi.
Shuningdek, imom-xatiblar yurtdoshlarimiz bilan oila mustahkamligi, o‘zaro mehr-oqibat, sabr-qanoat hamda saxovatning fazilatlari haqida diniy-ma’rifiy suhbatlar olib bordilar. Bu kabi xayriya tadbirlari jamiyatda hamjihatlik muhitini yanada mustahkamlashga, odamlar qalbida ertangi kunga ishonch uyg‘otishga xizmat qilmoqda.
O‘zbekiston musulmonlari idorasi
Qashqadaryo viloyati vakilligi
Matbuot xizmati