Rajab oyi hijriy –qamariy yil hisobining 7 oyi hisoblanadi. Rajab oyining nomlanishidagi “rajab” so'zi   nima ma'noni anglatadi?

“Rajab” so'zi arabcha so'z bo'lib,  u o'zbek tilidagi “qo'rqmoq”, “ulug'lamoq” kabi so'zlarning ma'nolarini ifodalaydi.

Ma'lumki, hijriy-qamariy yil hisobida  to'rtta shahrul-haram oy bo'lib, shulardan biri Rajab oyidir. Rajab oyi shahrul-haram ya'ni Alloh taolo insonlar orasida urush-nizo, janjallarni harom qilgan oydir.

Qadimda Rajab oyi kelsa, bu oyning hurmatidan insonlar o'zaro ixtiloflarni, urush-janjallarni to'xtatganlar. Bu esa Rajab oyi insonlarga xotirjamlik-tinchlik baxsh etadigan oy ekanligiga dalolat qiladi. Halqimiz Rajab oyini hurmatlab bu oyda tug'ilgan bolalarga Rajab deb ismlar qo'yishadi.

Mana xalqimizning “To'rt inog'a” deb ataydigan oylarning to'rtinchisi bo'lgan “Jumadul-oxir” oyi ham oxirlab qoldi. Bu yil 13 Yanvar' shanba kunidan Rajab oyi boshlanadi.

Rajab oyi ko'rinsa, uni barokatli bo'lishini Alloh taolodan so'rab duo qilamiz. Payg'ambarimiz sollallohu alayhi vasallam qachon yangi chiqqan oyni ko'rsalar shunday duo qilardilar:

"اللَّهُمَّ أَهِلَّهُ عَلَيْنَا بِالْيُمْنِ وَالْإِيمَانِ وَالسَّلَامَةِ وَالْإِسْلَامِ وَالتَّوْفِيقِ لِمَا تُحِبُّ وَتَرْضَى رَبُّنَا وَرَبُّكَ اللَّهُ  اللَّهُ أَكْبَر "

“Allohu akbar, Allohumma ahillahu alayna bil-yumni val-iymani, vas-salaamati val-tavfiqi, limaa tuhibbu va tarzo robbuna va robbukalloh ”.

"Allohu Akbar(Alloh buyuk), Ey, Allohim!  Bu oyni bizlarga baraka va imon, salomatlik va Islom va O'zing yaxshi ko'radigan, rozi bo'ladigan narsaga muyassar etish bilan chiqar. Ey, hilol, mening ham, sening ham Robbing Allohdir!" ( Imom Termiziy va Dorimiy rivoyati).

Alloh taolo kirib kelayotgan Rajab oyini barakali oylardan qilsin!

Ruhiddin Akbarov,

O'MIning Qashqadaryo viloyatidagi vakillik xodimi