Shu yil 14-15 aprel kunlari Farg‘ona viloyatida O‘zbekiston musulmonlari idorasi raisi o‘rinbosari Muhammadolim domla Muhammadsiddiqov va Toshkent islom instituti rektori Uyg‘un domla G‘ofurov, Oliy ma’had Qur’on va tajvid ustozlari ishtirokida ma’rifiy uchrashuvlar o‘tkazildi. 
 

Tashrif doirasida dastlab Farg‘ona shahri va Buvayda tumanidagi “Qur’oni karim va tajvid” o‘quv kurslarini tamomlagan 150 nafar bitiruvchiga sertifikatlar topshirilib, soha rivojiga hissa qo‘shayotgan mas’ullar taqdirlandi.

Shu bilan birga, viloyatdagi 160 nafar otinoyi va xotin-qizlar faollari uchun “Xotin-qizlarni radikal g‘oyalar ta’siridan himoya qilish tizimini mustahkamlash asoslari” mavzusida sayyor malaka oshirish o‘quvlari boshlandi. 

Uchrashuv va seminarlarda asosiy e’tibor jamiyatda sog‘lom diniy muhitni barqarorlashtirish, yoshlar tarbiyasi, bid’at va xurofotlarga qarshi ilm-ma’rifat bilan kurashish hamda tinchlik ne’matining qadriga yetish kabi dolzarb masalalarga qaratildi. 

Bu singari tadbirlar hududlarda ma’naviy muhitni sog‘lomlashtirish va mutaxassislarning kasbiy mahoratini oshirishda muhim omil bo‘lib xizmat qilmoqda. 
 

O‘zbekiston musulmonlari idorasi

Matbuot xizmati