Shu yil 13 fevral kuni O‘zbekiston musulmonlari idorasi raisi o‘rinbosari Muhammadolim domla Muhammadsiddiqov Afg‘oniston Fanlar akademiyasi Tarjima markazi rahbari Azizulloh Shinvoriy boshchiligidagi delegatsiyani qabul qildi. 
 

Muloqot davomida Amudaryoning ikki sohilida yashayotgan qardosh xalqlarni azaldan yagona din, mushtarak tarix va ezgu maqsadlar birlashtirib kelayotgani, keyingi yillarda ushbu qo‘shnichilik munosabatlari yangi bosqichda mustahkamlanib borayotgani alohida qayd etildi. Xususan, davlatimiz Rahbari tomonidan Afg‘onistonda tinchlik va osuda hayotni qaror toptirishga qaratilgan xalqaro tashabbuslari bugun o‘z mevasini berayotgani, ikki davlat ulamolari o‘rtasidagi tashriflar esa o‘zaro aloqalarni yanada jipslashtirayotgani ta’kidlandi.

Shuningdek, mehmonlarga Diniy idoraning 80 yillik boy tarixi, Fatvo markazi faoliyati va yurtimizdagi diniy ta’lim tizimi haqida batafsil ma’lumot berildi. 

O‘z navbatida, Azizulloh Shinvoriy O‘zbekistonga bo‘lgan yuksak ehtiromini izhor etib, bu zaminni nafaqat buyuk allomalar vatani, balki noyob ilmiy asarlar, muborak ziyorat va qadamjolar makoni sifatida qadrlashini bildirdi. Shuningdek, poytaxtimizda o‘tgan Burhonuddin Marg‘inoniy ilmiy merosiga bag‘ishlangan xalqaro konferensiya doirasidagi uchrashuvlar ikki xalq ilm ahllari uchun g‘oyat manfaatli bo‘layotganini e’tirof etdi.

Uchrashuv yakunida tomonlar ilm-ma’rifat va Islom dini ravnaqi yo‘lida hamkorlikni izchil davom ettirishga kelishib oldilar. Martabali mehmonga O‘zbekiston musulmonlari idorasining esdalik hadyalari topshirildi. 

Mazkur uchrashuvdan so‘ng martabali mehmonlar Hazrati imom majmuasi, xususan, Qaffol Shoshiy maqbarasini ziyorat qilish bilan birga Toshkent islom instituti faoliyati bilan yaqindan tanishildi.  

O‘zbekiston musulmonlari idorasi
Matbuot xizmati