Internet tarmoqlarida ayrim kimsalar “Bizga mazhab kerak emas” degan da’volarni qilishmoqda.“Bizga mazhab kerak emas” deb da’vo qiluvchi kishilarning da’volari go‘yoki dengizda safarga chiqqan kishilarning “bizga kema kerak emas” degan da’volariga o‘xshaydi.

Rivoyat qilishlaricha, Najib Fozil degan ulamo kemada kitob o‘qib ketayotgan ekan. Kemadagi kishilardan biri u zotga yaqinlashib:
- Hazrat Alloh bizga aql bergan, yana payg‘ambarlar yuborgan va sahifalar hamda kitoblar nozil qilgan bo‘lsa, shunda ham biror ulamoga ergashimiz shart-mi? Aqlimizni ishlatib to‘g‘ri yo‘lni topib ketar edik-ku?! dedi.
Shunda Najib Fozil kitobdan boshini ko‘tarib:
-  Suzishni bilansanmi? – dedilar. U:
- Ha bilaman – deb javob berdi. Najib Fozil:
- O‘zing suzishni bilsang, kemaga nima uchun chiqding, dengizda o‘zing suzib ketavermaysanmi? – dedilar.
Najib Fozilning bu savoliga u nima deb javob berishini bilmay qoldi.

Bu qissadan xulosa shuki, Islom shariati ulkan dengiz bo‘lsa, “mazhab kerak deyish” esa, dengiz safari uchun kemaga chiqishdir. “Shariat dengizida o‘zim suzaman, mazhab kerak emas” deyish esa, dengiz safariga kemasiz chiqish va o‘zini halokatga qo‘yishdir.
 
Alloh taolo barchamizni O‘zining haq yo‘lida bardavom qilib, to‘g‘ri yo‘lidan adashishdan asrasin!