2026 yil 7 aprel kuni "Muhammad ibn Ahmad al-Beruniy" o‘rta maxsus islom bilim yurtida bitiruvchi kurs talabalari uchun O‘zbekiston musulmonlari idorasi hamda Qoraqalpog‘iston musulmonlari qoziyoti mas’ul xodimlari ishtirokida ochiq muloqot bo‘lib o‘tdi.
Bilim yurti mudiri Jaloliddin Abdirazoqov boshchiligida o‘tgan uchrashuvda asosiy e’tibor yosh mutaxassislarning istiqboldagi faoliyatiga qaratildi.
Muloqot davomida joriy o‘quv yilida ta’lim muassasasini tamomlayotgan 35 nafar talabaga ularning ish joylari bo‘yicha taqsimoti, kelajakdagi xizmat vazifalari va sohada kutilayotgan mas’uliyatli jarayonlar haqida batafsil ma’lumotlar berildi.
Tadbir yakunida bitiruvchilarga diniy soha rivoji yo‘lida amalga oshiriladigan ishlar yuzasidan zarur tavsiya va ko‘rsatmalar taqdim etildi.
Bilim yurti matbuot xizmati
Buxoro tumanida “Yangi O‘zbekistonning tinchlik va ma’naviyat targ‘ibotchilari” tashabbusi doirasida keng qamrovli ma’naviy-ma’rifiy tadbir bo‘lib o‘tdi. “Imom Buxoriy” jome masjidida boshlangan muloqotlarda viloyat bosh imom-xatibi Jobir domla Elov, diniy soha xodimlari, otinoyilar va mahalla faollari ishtirok etdilar.
Tadbir davomida tuzilgan ishchi guruhlar hududdagi 6 ta masjid va 20 ta mahallaga biriktirilib, xayrli amallar amalga oshirildi. Jumladan, nuroniylar va ehtiyojmand oilalar holidan xabar olinib, bemorlarga moddiy va ma’naviy ko‘mak ko‘rsatildi. Shuningdek, nizoli va muammoli oilalar bilan o‘tkazilgan suhbatlar natijasida bir nechta xonadonlarda yarashuvga erishildi.
“Yashil makon” loyihasi doirasida masjid hovlisiga manzarali va mevali ko‘chatlar ekilgan bo‘lsa, “G‘uncha” bolalar bog‘chasiga uyushtirilgan tashrif jajji bolajonlarga haqiqiy bayram quvonchini ulashdi. Bu kabi tadbirlar jamiyatda mehr-oqibat, hamjihatlik va bag‘rikenglik muhitini yanada mustahkamlashga xizmat qilmoqda.
Naqshband.uz