To‘rt mazhab
To‘rt mazhab bu - mujtahid imomlarining xulosasidir. Sahoba va tobe’inlar fiqhining xulosasidir. U dinni tushunish borasida musulmonlarning mo‘tamad, tan olingan madrasalaridir. U toyilish va haddan oshishdan yiroq bo‘lgan, mo‘tadil yo‘l bo‘lib, Alloh taolo yerda unga qabulni bitgan, ulamolar quvvatlagan va barcha musulmon maktablari shularning asosiga barpo etilgandir.
Shu sabab, ushbu mazhablarga qarshi urushadigan, kurashadiganlar halokatga yo‘liquvchidir. Bu qarshiligi bilan solih salaflar e’tiqodiga qarshi urushuvchidir, sahobalar e’tiqodiga qarshi urushuvchidir va bu urinishi bilan Islom diniga qarshi urushuvchidir. Chunki Islom tushunchasi mana shu to‘rt mazhab madrasalari asosida shakllangan. Alloh taolo ushbu mazhab sohiblaridan O‘zi rozi bo‘lsin va barakotlaridan manfaatlantirsin.
Doktor Abdulqodir Husayn
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati
