O‘zbekiston musulmonlari idorasi jamoasi Toshkent viloyati Toshkent tumani “Ramadon” jome masjidi imom-xatibi Abdurahmon domla Astanoyevning vafoti munosabati bilan marhumning oila a’zolari va yaqinlariga chuqur ta’ziya izhor etadi.
Alloh taolo marhum ulamoni O‘z mag‘firatiga olsin, iymonlarini salomat qilsin, solih amallarini o‘zlariga hamroh etsin. Din rivoji, xalq ma’rifati va Vatan ravnaqi yo‘lida qilgan barcha xizmatlarini Alloh qabul aylasin!
Haq taolo marhum olimning ahli oilasi, farzandu arjumandlari, safdoshlari, shogirdlari va yaqinlariga chiroyli sabr berib, bu musibatlarini yaxshiliklar ila to‘ldirsin. Biz Buyuk Parvardigordan duo qilib so‘raymizki, marhum olimni o‘zining cheksiz rahmatiga olsin, jannat bog‘lariga doxil etsin.
O‘zbekiston musulmonlari idorasi jamoasi, ulamolari, imom-domlalari va o‘qituvchi-mudarrislari nomidan Abdurahmon domla Astanoyevning oila a’zolari, yor-birodarlari, safdoshlari va yaqinlariga hamdardlik bildiramiz.
Innaa lillaahi va innaa ilayhi roji’uun.
«Musibat yetganda «Albatta, biz Allohnikimiz va albatta, biz Unga qaytuvchimiz», degan sabrlilarga xushxabar bering».
O‘zbekiston musulmonlari idorasi
Muslim.uz
Imom Buxoriy nomidagi Toshkent islom institutida «May oyi – hadis ilmlari fan oyligi» munosabati bilan «Hadis va islom tarixi fanlari» kafedrasi tomonidan talaba-qizlar ishtirokida ma’rifiy uchrashuv tashkil etildi.
Tadbirga faxriy mehmon sifatida «Hilol-nashr» nashriyoti direktor o‘rinbosari, olima Odinaxon Muhammad Sodiq taklif etildi.
Odinaxon Muhammad Sodiq o‘z ma’ruzasida hozirda tadqiq qilayotgan «Sahih Buxoriy rivoyatida ayol roviylarning o‘rni» mavzusidagi ilmiy yangiliklar bilan o‘rtoqlashdi.
Suhbat davomida «Sahihul Buxoriy» asarining avlodlarga yetib kelishida nafaqat erkak muhaddislar, balki ayol roviylarning ham xizmati beqiyos ekani alohida ta’kidlandi. Mashhur ayol roviylar haqidagi ma’lumotlar va ilmiy dalillar taqdimot orqali talabalarga batafsil tushuntirildi.
Tadbir yakunida talabalar o‘zlarini qiziqtirgan savollarga javob oldilar. Mazmunli va ilmiy suhbat uchun Odinaxon Muhammad Sodiqqa institut ma’muriyati nomidan minnatdorchilik bildirilib, tashakkurnoma va esdalik sovg‘alari topshirildi.
Oliymahad.uz