2 iyun kuni "Haj – 2026" mavsumining navbatdagi guruh ziyoratchilari, xususan, ular safidagi 100 nafar "Prezident hojilari" muborak diyorda haj amallarini to‘liq ado etib, yurtimizga eson-omon yetib kelishdi.
Hojilarni Prezident Administratsiyasi Diniy-ma’rifiy masalalar bo‘yicha departamenti boshlig‘i Muzaffar Kamilov, “Haj - 2026” ishchi guruhi rahbari - Din ishlari bo‘yicha qo‘mita raisi Sodiqjon Toshboyev, O‘zbekiston musulmonlari idorasi raisining birinchi o‘rinbosari Homidjon Ishmatbekov, O‘zbekiston musulmonlari idorasi raisi o‘rinbosari Zayniddin domla Eshonqulov shuningdek, taniqli ulamolar, imom-domlalar, mutasaddilar va OAV vakillari ehtirom ila kutib olishdi.
Eslatib o‘tamiz, hojilarimiz muborak diyorda har bir qadamda ko‘rsatilgan e’tibor va g‘amxo‘rlikni his etishdi. Muqaddas joylarda haj arkonlarini ixlos bilan bajargan ziyoratchilar safar davomida muhtaram Yurtboshimiz, mehridaryo xalqimiz haqiga duolar qilib kelishdi.
Ona Vatan bag‘riga sog‘-salomat qaytib, yaqinlari bilan diydorlashgan hojilarimizning yuz-ko‘zlarida shukronalik, mamnunlik hissi dillarga yanada xursandchilik ulashdi.
Alloh taolo barcha hojilarimizning hajlarini mabrur, ibodatu duolarini maqbul aylasin!
O‘zbekiston musulmonlari idorasi
Matbuot xizmati
Shu yilning 3 iyun kuni O‘zbekiston musulmonlari idorasi tasarrufidagi «Ko‘kaldosh» va «Xoja Buxoriy» o‘rta maxsus islom ta’lim muassasalari talabalari O‘zbekistondagi Islom sivilizatsiyasi markazida bo‘lishdi. Bilim yurti mudarrislari boshchiligida tashkil etilgan ushbu ma’rifiy sayohatdan ko‘zlangan asosiy maqsad yoshlarni yurtimizda diniy-ma’rifiy sohada amalga oshirilayotgan keng ko‘lamli islohotlar va ajdodlarimizning boy ilmiy merosi bilan yaqindan tanishtirishdan iborat bo‘ldi.
Sayohat doirasida markaz mutaxassislari tomonidan talabalar uchun maxsus mahorat darsi tashkil etilib, unda Islom sivilizatsiyasi rivoji, yurt allomalarining jahon ilm-faniga qo‘shgan hissasi va qadimiy qo‘lyozmalar bilan ishlash usullari haqida muhim ma’lumotlar berildi.
So‘ngra talabalar markazda saqlanayotgan noyob qo‘lyozmalar, zamonaviy interaktiv ko‘rgazmalar hamda Imom Buxoriy, Imom Termiziy, Abu Mansur Moturidiy kabi ulug‘ zotlar hayotiga bag‘ishlangan bo‘limlarni katta qiziqish bilan ko‘zdan kechirdilar.
Bu kabi tadbirlar bo‘lajak diniy soha xodimlarini vatanparvarlik, ilmga muhabbat va ajdodlar merosiga sadoqat ruhida tarbiyalashda muhim omil bo‘lib xizmat qiladi.
O‘zbekiston musulmonlari idorasi
Matbuot xizmati