Tadbir doirasida Navoiy viloyati bosh imom-xatibi Temurxon domla Atoyev tumandagi «Qosim Shayx» jome masjidida diniy soha xodimlari bilan yig‘ilish o‘tkazdi. Unda hududda faoliyat olib borayotgan otinoyilarning jamiyatdagi o‘rni va ahamiyatiga alohida to‘xtalib, ular tomonidan amalga oshirilayotgan ma’naviy-ma’rifiy ishlar samaradorligi muhokama qilindi hamda galdagi muhim vazifalar belgilab olindi.
Sayyor seminar doirasida viloyat otinoyilari o‘zlariga biriktirilgan mahallalardagi ijtimoiy himoyaga muhtoj, nogironligi bo‘lgan va ko‘makka ehtiyojmand oilalar xonadonlariga kirdi. Suhbatlar davomida fuqarolarning ko‘ngli ko‘tarilib, diniy-ma’rifiy mavzularda nasihatlar qilindi va yurt tinchligi, xonadonlar osoyishtaligini so‘rab duolar qilindi.
Xayriya tadbiri davomida otinoyilar tomonidan jami 10 ta xonadon egalariga ma’naviy qo‘llab-quvvatlov bilan bir qatorda, zarur oziq-ovqat mahsulotlaridan iborat moddiy ehsonlar ham topshirildi.
O‘zbekiston musulmonlari idorasi
Matbuot xizmati
Toshkent islom instituti qoshida faoliyat yuritayotgan Jizzax shahridagi “Qur’oni karim va tajvid” o‘quv kursining navbatdagi bitiruvchilari va soha mutasaddilari ishtirokida uchrashuv bo‘lib o‘tdi.
Tadbirda Jizzax viloyati bosh imom-xatibi Mehmonxon domla Jabborov, Toshkent islom instituti rektori Uyg‘un domla G‘afurov, institut prorektori Jahongir qori Ro‘ziyev hamda diniy soha vakillari ishtirok etdi.
Uchrashuv davomida yurtimizda diniy-ma’rifiy sohada amalga oshirilayotgan keng ko‘lamli islohotlar, hukm surayotgan tinchlik va osoyishtalik ne’matining qadri hamda bu ezgu ne’matlarga shukronalik keltirishning ahamiyati haqida atroflicha so‘z yuritildi. Insonlarni, ayniqsa, yoshlarni ilm-ma’rifatga targ‘ib qilish bugungi kunning muhim vazifalaridan ekani alohida ta’kidlandi.
Tadbir yakunida o‘quv kursi faoliyati va rivojiga munosib hissa qo‘shib kelayotgan mas’ullar hamda hamkor tashkilot vakillari institut nomidan tashakkurnoma va esdalik sovg‘alari bilan taqdirlandi.
Shundan so‘ng o‘quv kursini muvaffaqiyatli tamomlagan tinglovchilarga sertifikatlar tantanali ravishda topshirildi.
Marosim so‘ngida yurt tinchligi, xalq farovonligi va ilm ahlining rivojini so‘rab xayrli duolar qilindi.
O‘zbekiston musulmonlari idorasi
Matbuot xizmati