Muborak Haj amallarini to‘la-to‘kis ado etgan o‘zbekistonlik ziyoratchilarni Vatanimizga olib kelish jarayonlari boshlandi. Xususan, Namangan xalqaro aeroportida Saudiya Arabistonidan qaytgan hojilarning dastlabki guruhlari tantanali ravishda kutib olindi. 
 

"Jidda – Namangan" yo‘nalishi bo‘yicha "Uzbekistan Airways" aviakompaniyasining zamonaviy havo laynerlarida Namangan viloyatining Chortoq, Pop, Norin va To‘raqo‘rg‘on tumanlaridan bo‘lgan jami 490 nafar hoji eson-omon ona diyorimizga yetib keldi.

Muborak zaminda Haq taoloning ulug‘ farzini chiroyli ado etib, sog‘-salomat o‘z yurtiga qaytgan ziyoratchilar yaqinlari diydoriga yetishganlari uchun cheksiz shukronalar aytishmoqda. Hojilar safar davomida ko‘rsatilgan yuksak darajadagi tashkilotchilik va yaratilgan qulay sharoitlardan mamnun ekanliklarini bildirib, yurtimiz tinchligi, el-yurt farovonligi haqqiga xayrli duolar qilishdi.

Namangan viloyatiga haj ziyoratchilarini olib keluvchi navbatdagi reyslar izchil davom etmoqda. 

O‘zbekiston musulmonlari idorasi
Matbuot xizmati