Savol: Qushlarni bir biriga chatishtirib, qushning yangi turini kashf qilish joizmi? Hozirda xonaki va yovvoyi qushlarning ma’lum turini bir biriga chatishtirish orqali insonga yoqimli ovozda sayraydigan qush turi kashf qilinmoqda ekan. Kashf qilingan qush bepusht bo‘lar ekan.

Javob: Bismillahir Rohmanir Rohiym. Alloh taolo yeru osmonlardagi barcha narsalarni insoniyat manfaati uchun yaratganini O‘z kalomida aytib o‘tgan. Josiya surasining 13-oyatida bunday deyilgan: “Va sizga osmonlardagi narsalarni va yerdagi narsalarni – hammasini O‘z tomonidan beminnat xizmatkor qilib qo‘ydi”.

Parrandalarni chatishtirishda shar’an monelik yo‘q. Hatto bundan bepusht parranda hosil bo‘lsa ham. Bu xuddi eshakni otga chatishtirib bepusht hayvon bo‘lgan xachir paydo qilishga o‘xshaydi. Ammo bu ish orqali qushga zarar va zulm qilish yoxud o‘sha qush tabiat uchun zarur bo‘lib, uning turi yo‘qolib kelishiga olib kelsa, nojoiz bo‘ladi. Vallohu a’lam.

O‘zbekiston musulmonlari idorasi
Fatvo markazi.