“Haj – 2027” mavsumiga tayyorgarlik ko‘rish hamda yurtdoshlarimiz uchun munosib sharoitlar hozirlash maqsadida, Saudiya Arabistonida mutasaddi idoralar bilan uchrashuvlar o‘tkazilmoqda. Ushbu muborak zaminda xizmat safarida bo‘lib turgan Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Vazirlar Mahkamasi mas’ul xodimi Orifxon Zakirov, attashe Shuhrat Amoniy qator tashkilotlar, jumladan, “Tavofa” haj xizmatlari muassasasi vakillari bilan muhim uchrashuvlar o‘tkazdilar.
Muloqot avvalida tomonlar ikki mamlakat rahbarlarining sa’y-harakatlari natijasida O‘zbekiston va Saudiya Arabistoni o‘rtasidagi hamkorlik aloqalari yangi bosqichga ko‘tarilganini, xususan, haj va umra ziyoratchilari uchun ko‘rsatilayotgan xizmatlar saviyasi yuksak darajaga chiqqanini alohida e’tirof etdilar.
Muzokaralar davomida bo‘lajak haj mavsumida kutib olishdan to kuzatishgacha bo‘lgan jarayonlarda, xususan, haj amallari bajariladigan Mino, Arafot va Muzdalifa vodiylarida hojilarimizga munosib xizmat ko‘rsatish hamda ularning har bir daqiqasini ruhiy huzur va ibodatda o‘tkazishlari uchun zarur shart-sharoitlarni yaratish masalalari yuqori talab nuqtayi nazaridan atroflicha muhokama qilindi.
O‘z navbatida, “Tavofa” muassasasi vakillari kelgusi mavsum uchun muborak maskanlarda shinam chodirlar tashkil etish, transport va oziq-ovqat ta’minotini yanada takomillashtirish, kommunal xizmatlar sifatini oshirish hamda sanitariya-gigiyena talablariga qat’iy rioya etish bo‘yicha aniq vazifalar belgilab oldilar.
Jumladan, ushbu vodiylarda har bir ziyoratchi uchun yetarli joy ajratish, chodirlarni tayyorlash, ularni “Sofa bed”, sovutkich hamda boshqa zarur maishiy qulayliklar bilan jihozlashga katta e’tibor qaratiladi. Shuningdek, hojilarimiz uchun zarur bo‘ladigan maishiy ashyolar jamlanmasi taqdim etish hamda ularni uch mahal issiq taom, muntazam choy va salqin ichimliklar bilan ta’minlash masalasiga ham alohida urg‘u berildi.
Muloqotda haj inson umrida bir marta ado etiladigan ulug‘ ibodat ekanini inobatga olib, ziyoratchilar muborak amallarni dinimiz ahkomlariga muvofiq go‘zal tarzda bajarishlari uchun barcha sharoitlarni hozirlash zarurligi alohida ta’kidlandi.
Bu kabi sa’y-harakatlar zamirida bitta ulug‘ maqsad – har bir hojimizga munosib e’tibor ko‘rsatish, ularning ibodatlarini eng qulay va xotirjam sharoitlarda ado etishlarini ta’minlashdir.
O‘zbekiston musulmonlari idorasi Matbuot xizmati
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
