Soxta salafiylikka mansub tashkilotlar
Hozirgi kunda soxta salafiylikka mansub deb hisoblanadigan yuzdan ortiq tashkilot faoliyat olib bormoqda. Ular qatorida «at-Tavhid val-jihad» («Yakkaxudolik va jihod», Falastin), «At-tali'a al-muqatila» («Jangchi avangard», Suriya), «Fath al-islam» («Islom fathi», Livan), «Jaysh al-Quds al-islamiy» («Muqaddas islom armiyasi», Iordaniya), «Harakat ash-shabab al-mujahidin» («Mujohid yoshlar harakati», Somali), «Jaysh Abi Bakr as-Siddiq as-salafiy» («Abu Bakr Siddiq salafiy armiyasi», Iroq), «Humaat ad-da'va as-salafiya» («Salafiy da'vat himoyachilari», Jazoir), «al-Jihadiya as-salafiya» («Salafiylik jihodi», Marokash), «Tolibon» («Talabalar», Afg'oniston), «Turkiston islom harakati» («TIH», sobiq «O'zbekiston islom harakati»), «Ittihad al-jihad al-islamiy» («Islom jihodi uyushmasi», «TIH» tarkibidan ajralib chiqqan guruh), «Jamaat Ansarulloh» («Ansorulloh jamoati», Tojikiston), «Jundul xilofa» («Halifalik lashkarlari», Qozog'iston), «Jayshul-Mahdiy» («Mahdiy armiyasi», Qirg'iziston) va boshqa bir qator tashkilotlarni sanab o'tish mumkin.
Qanday shaklda chiqmasin va qanday g'oya ostida harakat qilmasin soxta salafiylikning buzg'unchi mohiyati o'zgarmay qolmoqda. Buni uning islom asoslari buzilishiga olib boradigan:
– Qur'on oyatlarini so'zma-so'z talqin qilish, oyatlarning majoziy ma'nosi borligini rad etish;
– tavhidning yaxlit, bo'linmasligini inkor etish;
– mavludni nishonlash va Rasulullohning shafoatidan umidvor bo'lishni inkor etish;
– o'zlariga ergashmagan musulmonlarni kofirlikda ayblash;
– jihodni islomning oltinchi arkoni, deb e'lon qilishdek g'oyalar misolida ham ko'rish mumkin.
Chust tumani bosh imom-xatibi B.Sharipov
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
