Pokistonning “NewzToday” nashri va “NewzTodays TV” platformasida Samarqand shahrining boy tarixi, noyob me’moriy obidalari va milliy hunarmandchilik an’analariga bag‘ishlangan materiallar e’lon qilindi, deb xabar bermoqda “Dunyo” AA.

“Samarqand, O‘zbekiston: Amir Temurning Buyuk ipak yo‘lidagi poytaxtiga sayohat” nomli ushbu materiallarda qadimiy shaharning jahon sivilizatsiyasi tarixida tutgan o‘rni, uning betakror madaniy va ma’naviy merosi to‘g‘risida so‘z yuritilgan.

Samarqandning 2500 yillik tarixi, qadimda Maroqand nomi bilan tanilgani, Buyuk ipak yo‘lining muhim savdo va madaniy markazlaridan biri bo‘lgani haqida ma’lumotlar o‘quvchilar e’tiboriga taqdim etilgan. Shaharning savdo-sotiq, ilm-fan va madaniy almashinuvlardagi muhim o‘rni e’tirof etiladi.

Materiallarda Amir Temur va Temuriylar davrida qurilgan obidalar, xususan, Go‘ri Amir, Shohi Zinda ansambli va boshqalar haqida to‘xtalib o‘tilgan.

“Amir Temur va Temuriylar sulolasi vakillari tomonidan Samarqandda qurilgan obidalarning me’moriy xususiyatlari keyinchalik Pokiston va Hindistondagi Boburiylar me’morchiligida, jumladan, Humoyun maqbarasi va Toj Mahalda o‘z aksini topgan”, – deyilgan “NewzToday” manbasida.

Pokiston OAVning qayd etishicha, Samarqanddagi qadimiy obidalarda foydalanilgan me’moriy yechimlar pokistonliklar uchun ham katta qiziqish uyg‘otadi. Materiallarda buyuk astronom olim va davlat arbobi Mirzo Ulug‘bekning ilmiy merosi, uning Samarqandda barpo etgan rasadxonasiga alohida urg‘u berilgan.

Ta’kidlanishicha, Samarqand qog‘ozi tayyorlash an’anasi, ipakchilik va milliy hunarmandchilik, so‘zana tikish, kulolchilik hamda xalq amaliy san’ati namunalari necha-necha asrlar davomida avloddan-avlodga o‘tib kelmoqda.

E’tiborlisi, ushbu media loyiha Samarqandni nafaqat qadimiy obidalar shahri, balki jahon sivilizatsiyasi, ilm-fan va madaniyat taraqqiyotiga ulkan hissa qo‘shgan tarixiy markaz sifatida yana bir karra e’tirof etdi.

O‘zbekiston musulmonlari idorasi Matbuot xizmati