Jaholatning davosi albatta bu ma'rifatdir. Ma'rifat orqali inson etuk darajaga etadi va insonga loyiq bo'lgan barcha ezgu hislatlarni o'zida mujassam etib, yomon va chirkin odatlardan o'zini saqlab yuradi.

Ma'rifatli inson Allohning oldida ham insonlar nazdida ham martabasi baland bo'ladi. Bu xususida Alloh taolo Qur'oni karimning «Mujodala» surasining 11-oyatida: «Alloh sizlardan iymon keltirganlarning va ilm berilganlarning darajalarini ko'taradir».

Yana Alloh taolo Qur'oni karimda ma'rifatli inson bilan ma'rifatsiz inson barobar bo'lmasligini «Zumar» surasining 9-oyatida shunday bayon qiladi: «Biladiganlar bilan bilmaydiganlar teng bo'larmidi?!»

Ma'rifatli insonni dunyoda ham maqomi baland bo'ladi. Insonlar uni hurmat qilib, maslahat so'rab bilmaganini o'rganib, farzandlarini shunday ilmli bo'lishini orzu qilib va majlislarida joyning to'riga o'tqazib hurmatini joyiga qo'yadilar. Bu ma'rifatli insonning dunyodagi maqomi, oxiratdagi maqomini tasavvur qilavering.

Dunyoda sodir bo'layotgan qo'poruvchiliklar, yovuzliklar, qotilliklar, xunrezliklar va shunga o'xshash barcha yomon illatlarning zamirida ilmsizlik yotadi. Biz ilm egalari bunday toifa insonlar bilan ma'rifat ila kurashib, ularning qilayotgan amallarini jaholat va razolatdan boshqa narsa emas ekanligini isbotlab bera olsak jamiyatga katta foyda keltirgan bo'lamiz va jamiyatning farovon hayotiga hissa qo'shgan bo'lamiz. Oxiratdagi esa Alloh taoloning ajr-u mukofotiga sazovor bo'lamiz. Ilm ahli doim jaholatga qarshi ilm bilan kurashib kelmog'i lozim bo'ladi. Ilm Alloh taolodan berilgan ulug' ne'mat bo'lib, u xaqda qiyomatda so'ralinadi. Ilmni Alloh hamma insonlarga xam ato etavermaydi. Bu xususda Nabiy sallollohu alayhi vasallam o'z xadislarida shunday marhamat qiladilar:

«Alloh bandasiga yaxshilikni ixtiyor etsa, uni o'zidan qo'rqadigan olim qiladi. Uni to'g'ri yo'lga boshlovchi aql idrok beradi». (Buxoriy va Muslim).

Shuning uchun biz ilm ahllarining bo'ynida ulkan mas'uliyat borligini his qilib doim jaholatga ma'rifat bilan kurashib yashamog'imiz lozim va lobuddir. Alloh taolo ilm ahllariga bu ishlarida kuch-quvvat ato etsin!

Mo'minjon USMONOV
Guliston shahar “Tavhid” jome masjidi imom-xatibi