Bugun, 26 dekabr' kuni poytaxtimizdagi Hilton mehmonxonasida O'zbekistondagi Islom tsivilizatsiyasi markazi faoliyati va muzey ekspozitsiyasini shakllantirish ishlarini muvofiqlashtirish kengashining navbatdagi yig'ilishi bo'lib o'tdi. Unda Markaz mutasaddilari, olimlar, professorlar va soha mutaxassislari ishtirok etdi.

Yig'ilishni Prezident maslahatchisi, Kengash raisi Muzaffar Kamilov kirish so'zi bilan ochib, so'nggi yillarda yurtimizda diniy-ma'rifiy sohada xayrli ishlar amalga oshirilayotgani, xususan, Davlatimiz rahbari tashabbusi bilan qad rostlayotgan mahobatli O'zbekistondagi Islom tsivilizatsiyasi markazida keng ko'lamli qurilish va ta'mirlash, shuningdek, binoning tashqi va ichki qismlarini bezash ishlari jadal davom etayotganini alohida ta'kidladi.

Shundan so'ng Shoazim Minovarov O'zbekistondagi Islom tsivilizatsiyasi markazining 2023 yilda amalga oshirgan faoliyatiga doir hisobotini taqdim etish bilan birga Markazning navbatdagi katta loyihalari va rejalari haqida so'z yuritdi.

Tadbir asnosida Kengash a'zolari va soha mutasaddilari Markaz binosining tashqi va ichki bezaklaridagi xattotlik yozuvlari, ravoqlar uchun tayyorlanayotgan mahobatli rangtasvir asarlari, muzey ekspozitsiyasini shakllantirishning hozirgi holati va istiqboldagi vazifalar to'g'risida chiqish qilishdi.

Notiqlar qatorida so'zga chiqqan O'zbekiston musulmonlari idorasi Faxriylar kengashi raisi Shayx Abdulaziz Mansur hazratlari Markazdagi Qur'on zali ravoqlarini ipak gilam yuzasiga tushirilgan oyatlar bilan bezash bo'yicha amalga oshirilgan ishlar haqida so'zladi.

Yig'ilish asnosida Markaz bir vaqtning o'zida ham muzey, ham kutubxona, ham ilmiy-tadqiqotlar olib boriladigan ko'p tarmoqli ilmiy, madaniy, ma'rifiy, ma'naviy muassasa shaklida bunyod etilayotgani va shunga muvofiq ravishda uning faoliyati ham keng qamrovli bo'lishi ta'kidlanib, ushbu jarayonda Kengash tomonidan amalga oshirilgan ishlar va kelgusidagi rejalar muhokama etilib tegishli qarorlar qabul qilindi.

O'zbekiston musulmonlari idorasi
Matbuot xizmati