2023 yil 21 dekabr' kuni Turkiya Respublikasining Istanbul universiteti Ilohiyot fakul'teti anjumanlar zalida «Movarounnahrning Islom ilm-fani va madaniyatiga qo'shgan hissasi» mavzusida xalqaro konferentsiya o'tkazildi.

Anjuman «Ayo-Sofiya» masjidi imom-xatibi Ferruh Mushtuerning Qur'oni Karim tilovati bilan boshlandi.

Halqaro anjuman Istanbul universiteti rektori, professor Usmon Bulent Zulfiqor, UMAD- Uluslararası Müslüman Alimler Dayanışma Derneği – «Halqaro musulmon ulamolari birdamlik assotsiatsiyasi» prezidenti Abdulvahhob Ekinji va İHAM – Ilim hizmet ve araştirma merkezi – «Ilmiy xizmat va tadqiqot markazi» prezidenti professor Mustafo Karatashning kirish so'zlari bilan ochildi.

Yurtimiz delegatsiyasi tarkibida O'zbekiston musulmonlari idorasi raisi o'rinbosari, Toshkent islom instituti rektori, professor Muhammadolim Muhammadsiddiqov, Alisher Navoiy nomidagi til va adabiyot universiteti doktori Abdumurod Tilavov va doktor Abdumuxtor Rahmonov anjumanda ma'ruzalar bilan ishtirok etdilar.

Professor Muhammadolim Muhammadsiddiqov «Hanafiy mazhabining Movarounnahrga kirib kelishi, tarqalishi va rivojlanishi» mavzusida ma'ruza qildi.

Istanbul universiteti rektori, professor Usmon Bulent Zulfiqor Movarounnahrning insoniyat tarixi va Islom madaniyatidagi o'rni va ahamiyatiga urg'u berdi. Bu diyordan etishib chiqqan ulamolarning Islom diniga qo'shgan hissasiga to'xtalib, Temuriylar davlatining mintaqada ilm-fan va madaniyat borasidagi xizmatlariga alohida e'tibor qaratdi. Rektor Turkiya, jumladan Istanbul, universiteti bilan O'zbekistondagi oliy ta'lim muassasalari o'rtasidagi ilmiy aloqalar yanada rivojlanayotganini katta mamnuniyat bilan ta'kidladi.

Anjuman yakunida professor Muhammadolim Muhammadsiddiqov Istanbul universiteti rektori, professor Usmon Bulent Zulfiqorga esdalik sovg'alarini topshirdi.

TII Matbuot xizmati