Yahyo ibn Sa'id Qattondan rivoyat qiladi: “Biz Abu Hanifa rohmatullohi alayh bilan birga o'tirib, u zotdan ilm olardik. Allohga qasamki, qachon u zotga qarasam, yuzlarida Allohdan qo'rqishlari bilinib turardi”.
Ibn Muborakdan rivoyat qilinadi: “Men Kufaga kelganimda, Kufa ahlining eng faqihi haqida so'radim. Menga ”Abu Hanifa” deyishdi. So'ngra Kufaning eng zohid kishisi haqida so'radim. Menga “Abu Hanifa” deyishdi. Keyin esa Kufaning eng taqvodor kishisi haqida so'radim. Yana menga “Abu Hanifa” deyishdi”.

Muvaffaq Makkiy Mis'ar ibn Kidomdan rivoyat qiladilar: “Abu Hanifa rohmatullohi alayh bilan birga ketayotgan edik. To'satdan bir yosh bolani ko'rmasdan turtib yubordilar. Shunda haligi bola: “Ey shayx! Qiyomatdagi qasosdan qo'rqmaysizmi?” dedi. Abu Hanifa rohmatullohi alayh o'sha zahoti qo'rquvga tushib, hushlaridan ketdilar. O'zlariga kelgach, u zotga: “Ey Abu Hanifa, bu go'dakning so'zi sizning qalbingizga buncha qattiq ta'sir qilmasa?!” dedim. Abu Hanifa rohmatullohi alayh: “U bola bu gapni Alloh tomonidan ilhomlanib aytdi, deb qo'rqaman” dedilar.

Hasan ibn Umora Abu Hanifa rohmatullohi alayhning janozalarini o'qib turib aytganlaridek, bu zot tunning barchasini namoz, duo va yig'lash bilan qoim qilardilar. Qirq yil boshlarini yostiqqa qo'ymadilar. O'ttiz yil ro'za tutdilar. “Allohdan qo'rqqin” deyilganda xushidan ketadigan inson haqida yana nima deyish mumkin?! Olimlar u zotni yaxshilik bilan eslar va u kishining yuzlarida Allohga nisbatan qo'rquv alomati bo'lganini ko'rganlarida ular ham beixtiyor Allohni eslashardi.

Abduhalim Qayumov Kosonsoy tumani "Imom Husayn" jome masjidi imom xatibi