Abu Hanifa rohimahullohdan so'raldi:
- Siz kimlardansiz?
U zot javob berdilar:
- Salaflarni so'kmaydigan, qadarga iymon keltirgan, ahli qiblani biror-bir gunoh bilan kofirga chiqarmaydiganlardanman!

Ibn Kasir rohimahullohning "Al-bidaya van nihaya" kitobidan.

Abu Hanifa rohimahulloh Ummaviylar davlatining avji taraqqiy topgan, kuch-quvvatga to'lgan davrini ham, uning inqirozga uchrash vaqtini ham ko'rdi. Shuningdek, u Abbosiylar davlatining har tomonlama hukumronligi ortib, barcha ishlarida zafar qozonayotgan davrini ham topdi. Abu Hanifa rohimahulloh Ummaviylar davrida ellik ikki yil yashadi. Bu vaqt ichida u ilmiy va fikriy komillikka etib ulgurdi. Qolgan o'n sakkiz yil umrini Abbosiylar davlati vaqtida yashadi va bu davrga kelib uning fikriy odatlari va ilmiy yo'nalishlari qaror topgan va u o'zining ko'plab natijalarini berayotgan edi. Shunga ko'ra Abu Hanifaning hayoti davomida olgan ilmlarining aksari Ummaviylar davriga to'g'ri keladi. Abbosiylar davri esa, avval boshlagan ishlarining natijalari xosil bo'lish pallasi hisoblanadi.

Ja'farxon Sufiyev

To'raqo'rg'on tumani

"Ishoqxon to'ra" jome masjidi

imom noibi