Rasululloh sollallohu alayhi va sallam jannat onalar oyog'i ostida ekanligini xabar berishlari ham onalik martabasi qanchalik yuqorligidan dalolatdir.

Afsuski, bugun ona­siga, ayoliga yaxshi muo­mala qilmayotgan kim­salar bor. Achi­narlisi, ke­yingi paytlarda ota-onasidan norozi bo'lib, imom-domlalarga shikoyat qi­la­yotganlar paydo bo'lyapti. Buni ko'rib yoqa ushlaysan kishi. Nahot farzand o'z onasidan norozi bo'lsa? Axir ona dakki eshitish uchun bolasini katta qilganmi?!

Alloh taolo Qur'oni karimda: “Rab­bingiz sizlarga yolg'iz uning O'ziga ibodat qilishingizni hamda ota-onangizga yax­shilik qilishingizni amr etdi”, deb buyuradi (Isro surasi, 32-oyat). 

Demak, ota-onaga yaxshilik qilish Allohga ibodat qilgandan keyingi mu­him amal hisoblanadi.

Abu Hurayra roziyallohu anhudan rivoyat qilingan hadisda esa Rasululloh sollallohu alayhi va sallam: “Sizlarning yaxshilaringiz o'z ahli ayoliga yaxshi munosabatda bo'lganingizdir”, deganlar (Imom Abu Dovud rivoyati). 

Ojiza ayollarimizga mehr ko'rsa­tish, hurmat-izzat qilish har bir kishi­ning burchidir.

Hadicha roziyallohu anhoga Alloh­ning salomi va rahmati Rasululloh sol­lallohu alayhi va sallam vositalarida kelganini unutmasligimiz kerak. Abu Hurayra roziyallohu anhudan rivoyat qi­lingan hadisda Nabiy sollallohu alay­hi va sallamning huzurlariga Jabroil alayhissalom kelib: “Yo Rasululloh! Bu Hadicha u idishdan nonxo'rak olib kelmoqda. U sizni oldingizga kelsa, Rabbisidan salom etkazing va jannatdagi oltindan bo'lgan uyning bashoratini bering”, dedilar (Imom Buxoriy rivoyati). 

Albatta, Payg'ambarimiz sunnatlariga amal qilib, onasini, ayolini hurmat-ehtirom qilayotganlar ham yo'q emas. Ana shunday yigitlardan birining ishi barchamizga ibrat bo'lishi kerak.

Mashina oldi-sotdisi bilan shug'ulla­nadi­gan tadbirkor shu voqeani ay­tib ber­di: .

«Bir do'stim qimmat avtomashinasini sotishga majbur bo'lib qoldi. Bozorga tay­yorlash uchun menga olib kelib berdi. Uch kun mashinani yuvib, chiroyli holat­ga keltirdim. To'rtinchi kuni do'stim hov­liqib kirib keldi: “Og'ayni, ishqilib mashinamni biror kishiga sotishga va'da qilib qo'ymadingmi?” dedi. Men: “Yo'q, endi tayyor bo'ldi-ku”, dedim. Do'stim: “Hudoga shukr. Habaring bor, har yakshanba onamni manzarali joylarga olib borib, aylantirib kelaman. Bundan onam maza qilib hordiq chiqaradi. Kecha onam: “O'g'­lim, shu mashinang menga juda ma'qul-da. Ayniqsa, tabiatni tomosha qilishni zavqi bo'lakcha”, deb qoldi. Mashinani sotayotganimdan xabari yo'q edi-da. Kel, do'stim, shu mashinani sotmaylik. Pulni boshqa joydan toparman. Onam xursand bo'lsa bo'ldi, qolgani yo Razzoq”, dedi. Onasining bir og'iz so'zi uchun do'stim ma­shinasini sotmadi. Ammo ko'p o'tmasdan uning ishi yurishib, tijoratdan katta daromad ko'rdi. Hozir ham shu markabda doim onasining xizmatini qiladi».

Ha, onani rozi qilishda ko'p xayrlar bor. 

Ma'rufxon A_''LOHO'JAYeV,

Namangan shahri “Abdulqodir qori”

jome masjidi imom-xatibi