Кейинги йилларда Янги Ўзбекистонда ижтимоий, халқчил давлат барпо этиш, унинг маънавий асосларини мустаҳкамлаш ва таъсирчанлигини оширишда муқаддас ислом динининг ўрни беқиёс аҳамият касб этмоқда.
 

Дарҳақиқат, бугунги кунда кўп миллатли мамлакатимизда турли миллатлар ва диний конфессиялар ўртасидаги ҳамжиҳатликни мустаҳкамлаш, фуқароларнинг дин ва виждон эркинлигини таъминлаш, диний-маърифий меросимизни асраб-авайлаш, ёш авлодни миллий ва умумбашарий қадриятлар руҳида тарбиялашга алоҳида эътибор қаратилмоқдаки, бу юртимизда “Инсон қадри учун, инсон бахти учун” тамойили асосида амалга оширилаётган улуғвор ислоҳотларга уйғун ва ҳамоҳангдир.

Шу ўринда эътироф этиш даркор, муқаддас Ислом динининг эзгу тамойилларини чуқур ўрганиш, буюк тарихимиз ва маданиятимиз дурдоналарини, машҳур алломаларимизнинг бой меросини тўплаш ва кенг тарғиб этиш давлатимиз раҳбариятининг аҳамиятидаги масалалардан бири бўлиб турибди.

Жумладан, кўҳна Шарқ мўъжизаси – Самарқанд шаҳри 2025 йилда ислом маданияти пойтахти, деб эълон қилинди, улуғ ватандошимиз Имом Мотуридийнинг 1155 йиллик таваллуд санаси юртимиз бўйлаб кенг нишонланаётганлиги, Имом Бухорий, Имом Мотуридий ва Имом Термизий халқаро илмий-тадқиқот марказлари қаторига шу йил Бухоро шаҳрида ўз фаолиятини бошлайдиган Баҳоуддин Нақшбанд илмий-тадқиқот маркази ҳам қўшилди.

Қолаверса, пойтахтимизда бунёд этилаётган Ислом цивилизацияси маркази илмий-маънавий йўналишдаги улкан ва ноёб лойиҳа сифатида эл-юртимиз ва халқаро жамоатчиликда катта қизиқиш уйғотмоқда. Бу муаззам маскан кўп минг йиллик қадимий тарихимиз, бой ва бетакрор миллий маданиятимизнинг ёрқин  тимсоли сифатида Янги Ўзбекистон ҳаётидаги ғоят муҳим воқеага айланиши, шубҳасиз.

Ватанимиз истиқлолининг ўттиз тўрт йиллик байрами арафасида янграган қувончли хабар, яъни Ўзбекистон мусулмонлари идораси раиси, муфтий Шайх Нуриддин Холиқназар ҳазратларини Ислом дини таълимотини кенг ёйиш, халқимизни дину диёнатли, ҳалол-пок, элу юртига муҳаббатли қилиб тарбиялаш, ёшларни рушду ҳидоятга бошлаш йўлидаги хизматлари учун Президентимиз фармонига мувофиқ “Олий даражали Имом Бухорий” ордени билан тақдирлангани барча диний соҳа вакилларини бирдек мамнун этди.

Буюк муҳаддис бобомиз Имом Бухорий номидаги ушбу мукофотнинг муфтий ҳазратларига тақдим этилгани энг аввало мамлакатимизда диний қадриятларга бўлган юксак эҳтиром ва улкан шараф ифодасидир. Бинобарин, Шайх Нуриддин Холиқназар ҳазратларининг жонажон Ватанимиз равнақи, муқаддас динимиз ривожи ва меҳнатсевар халқ саодати йўлидаги 35 йиллик фидокорона меҳнатларининг самарасидир.

Шайх Нуриддин Ҳолиқназар ҳазратлари томонларидан охирги йилларда одамларнинг диний маърифатини ўстириш, масжидлар очиш, уларни обод этиш ва имом-хатибларни қўллаб-қувватлаш, Қуръон ва тажвидни ўргатиш, мусулмон олами ҳамкорлик борасида салмоқли ишлар амалга оширилганини фахр ила айтиш жоиз.

Биргина жорий йилнинг ўзида Ҳаж мавсумида 15 минг нафар ватандошимиз Ислом динидаги бешинчи муқаддас арконни эмин-эркин адо этишди. Эътиборлиси шундаки, икки йилдан буён мамлакатимиз раҳбари зиёрат вақтида муфтий ҳазратлари билан телефон орқали мулоқот қилиб, ҳожилар ҳолидан хабар олиши анъана тусига кирди. Ушбу давр мобайнида ҳожиларимиз, шу жумладан Наманган вилоятидан муқаддас зиёратни бажарган тўрт мингдан ортиқ ҳамюртимиз “Янги Ўзбекистоннинг тинчлик ва маънавият тарғиботчиларига айланамиз” ташаббусини ҳаётга татбиқ этишда жонбозлик кўрсатиб келишмоқда.

Ўзбекистон мусулмонлари идораси раиси, муфтий Шайх Нуриддин Ҳолиқназар ҳазратларининг саъй-ҳаракатлари билан муҳтарам ҳожи ота-оналаримиз жамиятда бирдамлик, оила ва маҳаллаларимизда меҳр-оқибат муҳитини янада мустаҳкамлаш, ёшлар тарбиясини кучайтириш, ўғил-қизларни илм-маърифатга, замонавий касб-ҳунарларни эгаллашга, Ватан ҳимоячиси бўлишга тарғиб этиш, муҳтож инсонларга кўмак беришда алоҳида ибрат ва намуна бўлишмоқда.

Мусохон домла АББОСИДДИНОВ,

Наманган вилояти бош

имом-хатиби