Cavol: Kimgadur biron narsani (pul)ni va'da qilib yoki bugun tayyor bo'ladi deb aytilgan vaqtga qilib bera olmasam, aytgan gapimni ustidan chiqa olmasam, buning hukmi qanday bo'ladi? Javob uchun oldindan rahmat.

Javob: Bismillahir Rohmanir Rohiym. Musulmon kishi harom bo'lmagan biror ishga yoki narsaga va'da bersa, va'dasini ustidan chiqishga imkon qadar harakat qilishi lozimdir. Biror kishi va'dasini ustidan chiqish niyatida va'da berib, biror uzr sababli va'dasini bajara olmasa, gunohkor bo'lmaydi.

عن زيد بن أرقم عن النبي صلى الله عليه وسلم قال إذا وعد الرجل أخاه ومن نيته أن يفي له فلم يف ولم يجئ للميعاد فلا إثم عليه. (رواه أبو داود)

Zayd ibn Arqam roziyallohu anhudan rivoyat qilinadi: Rasululloh sollallohu alayhi vasallam: "Kishi birodariga va'dasiga vafo qilish niyatida va'da bersa, lekin va'dasiga vafo qila olmasa, va'dalashgan joyga kela olmasa, u kishiga gunoh yo'q", dedilar (Imom Abu Davud rivoyati).

Ammo, va'dani bajarishda sustkashlik qilsa yoki bajarmaslik niyatida va'da bersa-yu va'dasini bajarmasa, qattiq gunohkor bo'ladi. Chunki va'da berib, uzrsiz uni bajarmaslik shar'an harom ish bo'lib, munofiqlik alomatidandir (“Mirqot ul-Mafotih” kitobi). Vallohu a'lam.

O'zbekiston musulmonlari idorasi Fatvo markazi.