Аввал хабар берганимиздек, айни кунда юртимиз бўйлаб уламоларимизнинг диний-маърифий суҳбатлари Тошкент вилоятида давом этмоқда.

Бугун, 8 июнь куни Ўзбекистон мусулмонлари идораси раиси ўринбосари Иброҳимжон домла Иномов Бекобод шаҳридаги “Қора мозор” жомесига ташриф буюриб, масжид янги биноси қурилиши билан танишиб, йиғилганлар билан маърифий суҳбат қурдилар. Жумладан, уларда юртимизда амалга оширилаётган хайрли ислоҳотлар, бугунги кундаги долзарб масалалар бўйича маъруза қилдилар. Бундан ҳудуд аҳли мамнун бўлиб, миннатдорлигини изҳор қилмоқдалар.

Шунингдек, Тошкент шаҳар бош имом хатиби ўринбосари Абдуқаҳҳор домла Юнусов Бекобод шаҳридаги “Нўъмон ибн Собит” жомесида, Тошкент шаҳридаги “Имом Термизий” масжиди имом-хатиби Исҳоқжон домла Бегматов Бекобод тумани "Далварзин" жоме масжидида йиғилганларга бугунги кундаги долзарб масалалар бўйича маърузалар қилиб бердилар ва намозхонларни қизиқтирган саволларга жавоб бердилар.

Ана шундай маърифий учрашувларни Бекобод туман “Туркман” жоме масжидида Тошкент шаҳар Чилонзор тумани бош имом-хатиби Эргашали домла Рустамов, Бекобод тумани “Мулла Маматқул” жоме масжидида Янгийўл тумани бош имом-хатиби Қамариддин домла, Бекобод туман “Хос” жомесида Тошкент шаҳар “Камолиддин Ориф ал-Бухорий” масжиди имом-хатиби Закариё домла Ҳафизуллаев, Бекобод тумани "Найман" масжидида Тошкент шаҳар “Ҳазрати Имом” масжиди имом-хатиби Ҳабибуллоҳ домла Абдураззоқов, Бекобод шаҳар “Ўзбекистон” жоме масжидида Тошкент шаҳар “Ракат” жоме масжиди имом-хатиби Раббимқул домла Муҳаммадиевлар ҳам ўтказдилар.

Тошкент вилоят вакиллиги матбуот хизмати