12 Май, 2026, 24 Зулқаъда, 1447
12 Май, 2026, 24 Зулқаъда, 1447
Жорий йилнинг 5-6 апрель кунлари кўриш, эшитиш ва нутқида имкони чекланганлар билан Бухоро вилоятига MUSLIM TOUR томонидан зиёрат уюштирилди.
Бухорода зиёратчиларни MUSLIM TOUR ходимлари гидлар билан биргаликда кутиб олишди. Бухоро шаҳридаги “Мир араб” мадрасаси, “Масжиди Калон” масжиди, Лаби ҳовуз, “Баҳоуддин Нақшбанд”, “Саййид Мир Кулол” зиёратгоҳларига саёҳат уюштирилди.
Зиёрат давомида кўзи ожиз инсонларимизга эшитиш ва нутқида имконияти чекланганлар ихлос билан ёрдам беришди. Иккита жамият аъзоларини бир-бирларини қўллаб-қувватлашлари атрофдаги инсонларнинг кўз ёшларига сабаб бўлди.
Автобусда зиёратгоҳларга кетаётган вақтда кўзи ожизлар томонидан айтилган гўзал нашидларга кар-соқовларимиз ихлос билан, ўз ҳаракатлари билан биргаликда қўшилиб жўр бўлдилар.
Зиёратдан гўзал таассуротлар билан қайтар эканмиз, кўзи ожиз Абдураҳим хожи отанинг сўзлари юракларга муҳрланди: “Зиёратни ташкил қилганлар, ҳомий бўлганлар, бизларга зиёрат вақтида ёрдам берган яқинларимизга чин қалбимиздан миннатдорчилик билдирамиз. Алҳамдулиллаҳ, илм маркази бўлиб келган Бухорога боришдек орзуимни ушалиши мени беҳад қувонтирди”
Зиёратни ташкил қилишда имконияти чекланганлардан иккита жамият аъзоларини бирга олиб кетиш бир оз қийинчилик туғдириши мумкинлигини ўйлаган эдик. Аммо аксинча, улар имконияти чекланган бўлишига қарамасдан бир-бирларига чин юракдан ёрдам беришларини кўриб хурсанд бўлдик.
Имконияти чекланганлар MUSLIM TOUR раҳбари Б.Тошпўлатов ва барча ходимларга, “Вақф” хайрия жамоат фондига, ҳомийларга ўз миннатдорчиликларини изҳор қилишди.
Аллоҳ таоло уларга кўнгли ярим инсонларнинг кўнглини олиб, Каъбани обод қилганлик савобларини насиб этсин!
Мунира АБУБАКИРОВА
Ўзбекистон мусулмонлари идораси мутахассиси
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Макка шаҳридаги ҳамюртларимиз истиқомат қилаётган меҳмонхонада зиёратчиларга гўзал ва манфаатли маъруза қилдилар.
Самимий ва файзли руҳда ўтган мулоқот давомида Муфтий ҳазратлари Ер юзидаги энг муқаддас шаҳар — Маккаи мукаррама ва инсоният қалбининг қибласи бўлган Каъбаи муаззаманинг фазилатлари ҳақида сўзлаб бердилар.
Маърузада Макка шаҳри Ҳақ таоло томонидан танлаб олингани, Каъбаи муаззама эса «Байтуллоҳ», яъни Аллоҳнинг уйи, дея шарафлангани оят ва ҳадислар билан тушунтириб берилди.
Муфтий ҳазратлари дунёда миллионлаб мўмин-мусулмонлар фақат бир бинога — Каъбага қараб намоз ўқишининг асл моҳиятига тўхталдилар. Дарҳақиқат, жазирамада, кимсасиз саҳрода Иброҳим алайҳиссалом ўғли Исмоил алайҳиссалом билан оғир тошларни кўтариб, Каъбани қурганлар. Аммо улар бу улуғ ишни тугатиб, Аллоҳнинг амрини адо этдик, дея кибрланмасдан, аксинча: «Эй Роббимиз! Биздан қабул қилгин...» дея йиғлаб дуо қилганларини таъсирли шаклда сўзлаб берилди.
Манфаатли суҳбат давомида бўлғуси ҳожиларга Иброҳим алайҳиссалом каби амалларининг қабул бўлишини сўраб дуолар қилишлари, ҳожи бўлиш бирор мартаба эмаслиги, балки ҳаж гуноҳлардан покланиш ва ажру мукофотларга эришиш фурсати эканини эслатиб ўтилди.
Учрашув якунида Аллоҳ таолодан юртимиз равнақи, халқимиз фаровонлиги, ёшларимиз илм-маърифатли ва Давлатимиз Раҳбарининг хайрли ислоҳотлари бардавом бўлиши учун дуолар қилинди.
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 