Рамазон доимо муносиб вақтда келади. Уни бизга Роббимиз дунё хароб қилган ҳаётимизни яна бир бор тузатиш, қадамларимизни мувозанатга солиш, уни янгидан Ўзи томон олиб борадиган йўлга йўллаш учун юборади. Муҳими, У бизга бунга қодирлигимизни эслатади.

1. Рамазон бизга ҳар кеча бир пора Қуръон ўқиш қийин эмаслигини, аммо дунё бизни эгаллаб олганини ўргатади!

2. Рамазон бизга ҳар ой уч кун рўза тутишни қийин иш эмаслигини, аммо биз бурч ва мажбуриятларимиз қолиб Аллоҳ бизга аниқ ёзиб қўйган нарсалар билан банд эканимизни ўргатди.

3. Рамазон бизга кечалари туриб икки ракат намоз ўқиш қийин иш эмаслигини, ибодатлар машаққат бўлмаслигини, аммо бизнинг қалбимиз хароб бўлганини ўргатди.

4. Рамазон бизга Аллоҳ учун бир нарсаларни тарк қила олишимизни, уларни тарк қилишда лаззат борлигини, бу лаззатни уларни тарк қилмай топиб бўлмаслигини, бизнинг тарк қилишдан ожиз эмаслигимизни, озгина қўрқоқ эканлигимизни ўргатди.

5. Рамазон бизга йилнинг истаган пайтида садақа қила олишимизни, фақирларни қалбан ҳис қилишимиз мумкинлигини, уларни эслаш учун ошқозонни бўшатиш шарт эмаслигини ўргатди.

6. Рамазон бизга бомдод намозига туриш шайтон васваса қилганидек оғир иш эмаслигини, уни муаззин айтганидек "уйқудан яхшироқ" эканлигини ўргатди.

7. Рамазон бизга масжидга қадам босиш лаззат эканини, саодат фақатгина Аллоҳ билан бирга бўлишда эканини ўргатди.

8. Рамазон бизга энг илиқ макон уйимиз эканини, оила аъзоларимизнинг бир жойда ифторда жамланиши оилага жон ато қилишини ўргатди.

9. Рамазон бизга қўшнига бир идишда овқат жўнатиш меҳр-оқибатни зиёда қилишини, улардан бир идишда овқат қабул қилиш эса муҳаббат мактубига менгзалишини ўргатди.

10. Рамазон бизга хонадонимиз аёлларимиз сабри устига бино қилингани, биз эркаклар куннинг охирида силламиз қуриб дам олаётганимизда аёлларимиз ошхонада тинмаслигини, улар ҳақиқатда бизнинг эҳтиромимизга муносиб эканини ўргатди!

Абдулқодир ПОЛВОНОВ