Навбатдаги сайёр учрашув манзили – Нарпай
2024 йил 22 октябрь куни навбатдаги сайёр йиғилиш Нарпай туманида бўлиб ўтди. Вилоятдаги 16 та шаҳар-туман бош имом хатиблари ва иқтидорли имом-хатиблар тумандаги 18 та масжид имом-хатиблари ҳамроҳлигида 18 та маҳаллага тарқалиб, жойларда аҳолининг кам таъминланган ва нотинч оилаларда бўлди.
Шунингдек, маҳалла марказларида уюшмаган ёшлар билан суҳбатлар ташкил этилди. Ҳар бир маҳалладаги фуқаролар сони, ижтимоий ҳолати ва муаммолари таҳлил қилинди. Шу билан бирга, вилоят ишчи гуруҳи Нарпай туманидаги 18 та масжидда пешин намозини ўқиб, йиғилган намозхонларга бугунги кундаги долзарб мавзулар юзасидан маърузалар қилди ва уларнинг муаммо ва таклифларини тингладилар.
Мазкур тадбирлардан сўнг сайёр учрашувда иштирок этган диний соҳа ходимлари билан таҳлилий йиғилиш ўтказилди. Унда Нарпай туманидаги маҳаллаларда ўрганилган муаммолар, туманда диний соҳадаги ютуқ ҳамда камчиликлар ҳамда намозхонлар томонидан қилинаётган шикоятлар муҳокама қилинди.
Мазкур йиғилишга вилоят бош имом-хатиби в.в.б. Ё.Мансуров бевосита бош бўлди. Унда аҳолининг турли қатламларидан ўрганилган камчилик ва муаммолар ҳамкор ташкилотлар билан биргаликда ижрога йўналтириш чоралари муҳокама қилинди. Шунингдек, диний соҳа ходимларига раҳбарлар томонидан аҳолининг муаммоларини янада чуқурроқ ўрганиб, уларни бартараф этиш, улар билан янада яқин бўлиш, соҳани янада такомиллаштириш бўйича керакли кўрсатма ва топшириқлар берилди.
Ўзбекистон мусулмонлари идораси
Матбуот хизмати
Хато – банданики
Бир йигит масжидга келиб бироз ўтиргач, имомга эътироз билдирди:
– Энди масжидга келиб ўтирмасак ҳам бўларкан...
Имом ундан нима учун бундай деганининг сабабини сўради. Йигит ён-атрофдаги ҳамма одам телефонга қараб ўтиргани, баъзилари ўзаро гаплашаётгани учун шу гапни гапирганини айтди.
Имом бироз ўйлаб тургач, бундай деди:
– Яхши, эътирозинг ўринли. Мен бу ҳақда одамларга эслатиб турибман. Лекин сен энди масжидга келмоқчи бўлмасанг бир иш қилиб кет.
Йигит рози бўлди. Имом унга бир пиёлани тўлдириб сув берди ва шу сувни бир томчи ҳам тўкмасдан масжиднинг ичини бир айланиб чиқишини илтимос қилди. Йигит бор диққат-эътиборини жамлаб, оҳиста қадамлар билан, икки кўзини пиёладан узмаган ҳолда вазифани муваффақиятли адо этди.
Имом унга деди:
– Баракаллоҳ! Энди менга айт-чи, сен шу топшириқни бажараётганингда кимлар гапириб ўтирди, кимлар телефонига қаради?
Йигит жавоб берди:
– Мен қаердан билай, ахир бутун диққатим сувни тўкиб қўймасликда эди.
Имом деди:
– Ана кўрдингми? Сен топшириқни бажараётганингда бутун фикру ҳаёлингни бир жойга жамладинг. Аллоҳнинг ҳузурида турганимизни ҳис қилиб, хаёлимизни ибодатга, Унинг зикрига қаратсак, бошқаларнинг хатосини кўришга вақтимиз ҳам қолмайди. Албатта, кимдир хато қилса бу сенинг ҳидоятдан юз буриб кетишингга сабаб бўлмаслиги керак. Чунки хато динники ё масжидники эмас, балки банданики...
Йигит ўйлаб кўриб, хато қилганини тушунди. Кейинги жамоат намозларида хушу билан қатнашишда давом этди.
Акбаршоҳ РАСУЛОВ