Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
صَلَواتُ اللهِ و ملَائِكَتِهِ وَ أَنْبيَائِهِ وَ رُسُلِهِ وَ حَمَلَةِ عَرْشِهِ وَ جَمِيعِ خَلْقِهِ عَلَى سَيِّدِنَا مُحَمَّد وَ عَلَى اَلِهِ وَصَحْبِهِ أَجْمَعِينَ
Ўқилиши: Солаватуллоҳи ва малаикатиҳи ва анбияиҳи ва русулиҳи ва хамалати ъаршиҳи ва жамиъи холқиҳи аъла саййидина Муҳаммадин ва ъала алиҳи ва соҳбиҳи ажмаъийн!
Маъноси: Саййидимиз ҳазрати Муҳаммадга, ул зотнинг оилалари (аҳли)га ва ҳамма саҳобаларига Аллоҳнинг, Унинг фаришталарининг, пайғамбарларининг, элчи-расулларининг, Унинг Аршини кўтариб турган малоикаларнинг ва барча-барча яралмишларнинг салоту саломи бўлсин!
Манба: “Ал-адъиятул-варидату фил-аятил каримати вал-аҳадисиш-шарифаҳ”.
Наманган вилоятида “Ҳидоя” ўрта махсус ислом таълим муассасаси битирувчиларини ишга тақсимлаш бўйича учрашув ўтказилди. Унда Ўзбекистон мусулмонлари идораси раиси ўринбосари Муҳаммадолим Муҳаммадсиддиқов, Кадрлар бўлими бошлиғи Салоҳиддин Шерхонов, Масжидлар билан ишлаш бўлими бошлиғи Музаффар Камолов, Наманган вилояти бош имом хaтиби Абдуллоҳ Самадов ҳамда таълим муассасаси директори Қобилжон Мирзабоев битирувчиларни ишга тақсимлашга доир масалаларга тўхталишди.
Маълумот учун, "Ҳидоя" ўрта махсус ислом таълим муассасасининг бу йилги битирувчилари сони 35 нафар бўлиб, юртимиздаги масжидларга имом-хатиб ва имом ноиби вазифаларига тайинланади. Таълимни давом эттирмоқчи бўлганлар эса Тошкент ислом институти ва бошқа олий таълим муассасаларига ҳужжат топширишлари мумкин.
Шунингдек, таълим муассасасида “Ёшлар ўртасида ватанпарварлик туйғусини шакллантириш куни” муносабати билан тадбир ўтказилди. Тадбирда Ўзбекистон мусулмонлари идораси раиси ўринбосари, профессор Муҳаммадолим домла Муҳаммадсиддиқов сўзга чиқиб, ёш авлод қалбида Ватанга бўлган муҳаббат, миллий ғурур ва фидойилик туйғуларини сайқал топтириш ҳамма даврлар учун муҳим вазифа саналиб келишини таъкидлади.
Тадбирлар сўнгида талабаларни қизиқтирган саволларга жавоблар берилиб, хайрли дуо қилинди.
Ўзбекистон мусулмонлари идораси
Матбуот хизмати