30 Май, 2026, 12 Зулҳижжа, 1447
30 Май, 2026, 12 Зулҳижжа, 1447
Ўзбекистон мусулмонлари идораси ҳузуридаги “Вақф” хайрия жамоат фонди томонидан ижтимоий кўмакка муҳтож оилаларни қўллаб-қувватлашга қаратилган хайрли лойиҳалар изчил давом эттирилмоқда.
Шу йилнинг 14 апрель куни Фонд ҳомийларнинг маблағлари ҳисобидан пойтахтимизда қурилган янги кўп қаватли уйлардан харид қилинган 14 та хонадон ўз эгаларига топширилди.
Ўзбекистон мусулмонлари идораси ва Тошкент шаҳар вакиллиги раҳбарияти, Фонд мутасаддилари, саховатпеша ҳомийлар ҳамда ОАВ вакиллари иштирок этган ушбу маросим ҳақиқий меҳр-оқибат байрамига айланиб кетди.
Тадбирда сўзга чиққан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, жумладан, бундай деди:
– Бундай олижаноб ташаббус Президентимизнинг ижтимоий ҳимояга муҳтож аҳоли қатламларини қўллаб-қувватлашга қаратаётган эътиборларининг бир амалий ифодасидир. Давлатимиз Раҳбарининг бу борада ажратган катта миқдордаги маблағи бу ишларнинг янги босқичга чиқишида катта туртки бўлди. Мазкур хурсандчилик тадбири ҳам ана шу хайрли ишларнинг узвий давомидир.
Таъкидлаш жоизки, “Вақф” фонди ўтган 2025 йил давомида ҳам 55 та уйга муҳтож, етим-мискин оилага тўлиқ жиҳозланган турар жойларни туҳфа этган эди. Бу галги хайрли иш эса узоқ йиллардан буён бошпанасиз ва ижарада сарсон бўлиб юрган юртдошларимиз учун кутилмаган қувончли воқеа бўлди.
Янги хонадон калитларини қабул қилиб олаётган оилаларнинг қувонч кўзёшлари ва самимий дуолари тадбир иштирокчиларини тўлқинлантириб юборди.
Жумладан, тўрт фарзанднинг онаси Оиша Раҳимжонова бундай деди:
“Бугун биз учун янги ҳаёт бошланди. Кўп йиллар фарзандларим билан ўз уйимиз бўлишини орзу қилгандим. Бу туҳфа бир мўъжизадек бўлди. Аввало, Аллоҳга шукроналар бўлсин, сўнгра бизни қўллаб-қувватлаган саховатли инсонларга мингдан минг раҳматлар айтаман”.
Шундай қилиб, яна 14 та оила ўз уйига эга бўлиб, жамиятимизда инсон қадри нақадар баланд эканини ўз ҳаётлари мисолида ҳис этишди.
“Вақф” хайрия жамоат фонди халқимизнинг меҳр-оқибат ва саховат каби олижаноб қадриятларини янада мустаҳкамлаш йўлида хизмат қилишда давом этади.
Ўзбекистон мусулмонлари идораси Матбуот хизмати
1. Арафа куни кечаси, яъни, ҳайит кунига ўтар кечасини бедор ўтказиш.
Ҳайит кунига ўтар кечани Қуръон тиловати, зикр, тасбиҳ ва нафл намозлар билан ўтказиш улкан савобларга сабаб бўлади. Расулуллоҳ соллалоҳу алайҳи васаллам: "Ким икки ийд кечаларини Аллоҳдан савоб умидида қоим қилса, қалблар ўладиган кунда унинг қалби ўлмас”, деганлар (Ибн Можа, Табароний ривояти).
2. Ғусл қилиш. “Расулуллоҳ соллаллоҳу алайҳи васаллам фитр, азҳо ва арафа кунлари ғусл қилар эдилар” (Ибн Можа ривояти).
3. Энг яхши, янги ёки тоза кийимларни кийиш.
4. Хушбўйланиш.
5. Қурбон ҳайити намозига чиқишдан олдин ҳеч нарса емаслик. “Расулуллоҳ соллаллоҳу алайҳи васаллам Рамазон ҳайитида таомланмасдан чиқмасдилар, қурбонлик кунида эса намоз ўқигунларича таомланмасдилар” (Имом Термизий ривояти).
Эслатма! Баъзилар қурбон ҳайитида ҳеч нарса емай намозга чиқишни нотўғри тушуниб, куннинг аввалги ярмига қадар рўзани ният қилиш керак, дейишади. Шу билан бирга, ўша куни саҳарликка туришади ва оғизларини ният билан беркитиб намозга чиқишади. Ҳайит намози ўқиб бўлингач эса, худди ифторликдаги каби оғизларини очишади. Бундай қилиш нотўғри. Ҳайит кунларида рўзани ният қилиш ҳаром амал саналади. Қолаверса, ярим кунга рўза ният қилинмайди.
6. Масжидга имкон бўлса пиёда ва эртароқ бориш. “Расулуллоҳ соллаллоҳу алайҳи васаллам икки ҳайит намозига пиёда юриб чиқардилар” (Ибн Можа ривояти).
7. Йўлда таҳлил (Лаа илаҳа иллаллоҳ), такбир (Аллоҳу акбар) ва таҳмид (Алҳамдулиллаҳ) айтиш. "Аллоҳу акбар, Аллоҳу акбар, Лаа илаҳа иллаллоҳу Аллоҳу акбар, Аллоҳу акбар ва лиллаҳил ҳамд".
8. Ҳайит намозидан олдин бошқа бирор нафл намоз ўқимаслик. Масжидга боргандан сўнг таҳийятул масжид ёки бошқа бирор нафл намоз ўқимасдан зикр қилиб ўтириш лозим.
9. Намозга бир кўчадан бориб, бошқасидан қайтиш. Набий соллаллоҳу алайҳи васаллам шундай қилар эдилар.
10. Ҳайит билан муборакбод этиш. Саҳобалар: "Тақоббал Аллоҳ минна ва минкум (Аллоҳ биздан ҳам, сиздан ҳам қабул этсин)", деб бир-бирларини байрам билан табриклашарди.
11. Аҳли аёл ва ёш болаларни хурсанд қилиш. Оилада байрам кайфиятини пайдо қилиш, совға-ҳадялар улашиш керак.
12. Қавм-қариндош, ёш улуғларни зиёрат қилиш.
13. Таниш-билиш, ёру дўст, қўни-қўшниларни байрам билан табриклаш.
Қурбон ҳайитингиз муборак бўлсин!
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа