Ўзбекистон Республикаси давлат мустақиллигининг 35 йиллиги арафасида "Вақф" хайрия жамоат фондининг Наманган вилояти филиали томонидан эзгу ташаббус амалга оширилди.

Ижтимоий ҳимоя миллий агентлиги тавсиясига асосан, вилоятнинг турли ҳудудларидан келган, боқувчисини йўқотган ва меҳрга муҳтож 35 нафар болажон учун суннат тўйи ташкил этилди.

Тадбир тафсилотлари: 

– Ҳар бир тўй боласига ҳомийлар томонидан велосипед, костюм-шим ва байрамона сарполар ҳадя қилинди.

–  Болажонлар ва уларнинг яқинлари учун байрам дастурхони ёзилиб, унутилмас ва кўтаринки кайфият улашилди.

– Наманган вилояти бош имом-хатиби Абдуллоҳ домла Саматов иштирок этиб, бу хайрли ишга ҳисса қўшган ҳомийларга миннатдорлик билдирди ва фарзандлар камолини сўраб дуо қилди.

Бу каби савобли тадбирлар жамиятимизда меҳр-оқибат, саховат ва инсонпарварлик фазилатларини янада мустаҳкамлашга хизмат қилади. 

Ўзбекистон мусулмонлари идораси

Матбуот хизмати