Шу йилнинг 16–18 апрель кунлари Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги делегация икки томонлама алоқаларни ривожлантириш ва ватандошлар билан учрашувлар ўтказиш мақсадида Россия Федерациясида хизмат сафарида бўлади.
Сафар доирасида:
диний идоралар ўртасида ҳамкорликни мустаҳкамлаш;
имзоланган келишувларни амалга ошириш;
ўзаро тажриба алмашиш;
таълим даргоҳларида бўлиш;
жоме масжидлар фаолияти билан яқиндан танишиш кабилар режа қилинган.
Шунингдек, Москва шаҳрида ўқиш ёки иш билан юрган ҳамюртларимиз билан мулоқотлар қилиш, уларнинг фикр-мулоҳазаларини тинглаш ва эътиқод соғломлигига қаратилган суҳбатлар ўтказиш кўзда тутилган.
Ўзбекистон мусулмонлари идораси
Матбуот хизмати
Муборак Қурбон ҳайити арафасида Қашқадарё вилоятида аҳолини ижтимоий ва тиббий қўллаб-қувватлашга қаратилган кенг кўламли хайрия тадбирлари ўтказилмоқда.
Хусусан, оғир ва ногиронликка олиб келувчи касалликларга чалинган болаларнинг жарроҳлик амалиётлари, онкологик ва гематологик хасталиклари бор беморларни даволаш, шунингдек, жигар ва буйрак трансплантацияси харажатларини қоплаш учун ажратилган маблағлар “Вақф” хайрия жамоат фонди томонидан ўз эгаларига топширилмоқда.
Мазкур савобли ишларда вилоят соғлиқни сақлаш бошқармаси бошлиғи Низом Қурбонов ҳамда вилоят бош имом-хатиби Раҳматилло домла Усмоновлар иштирок этиб, беморлар хонадонига ташриф буюрдилар ва уларнинг ҳаққига хайрли дуолар қилдилар.
Бу каби эзгу тадбирлар юртимизда инсон қадрини улуғлаш ва эҳтиёжманд фуқароларга меҳр-мурувват кўрсатишнинг гўзал намунаси бўлмоқда.
Ўзбекистон мусулмонлари идораси
Қашқадарё вилояти вакиллиги
Матбуот хизмати