Бугун, 5 май куни Ўзбекистондаги Ислом цивилизацияси марказида “Ислом цивилизациясида илмий анъана: манбалар, долзарб масалалар ва салоҳият” мавзусида нуфузли халқаро конференция ўз ишини бошлади.

Ушбу нуфузли анжуман Президентимиз Шавкат Мирзиёевнинг цивилизациялар ўртасидаги мулоқотни мустаҳкамлаш, тинчлик ва ўзаро англашув маданиятини ривожлантириш ҳамда илм-фанни барқарор тараққиёт асоси сифатида илгари суришга қаратилган халқаро ташаббуслари ижроси доирасида ташкил этилмоқда.
 

Тадбирда олий мартабали меҳмон сифатида иштирок этаётган Малайзия Қироличаси Олий Ҳазратлари Раджа Зарит София ўз нутқида икки давлат ўртасидаги илмий дипломатия ва халқаро гуманитар ҳамкорликнинг янги босқичи бошланишини алоҳида қайд этади.

Анжуман давомида 300 нафардан ортиқ маҳаллий ва хорижий олимлар, давлат ва жамоат арбоблари ҳамда диний соҳа вакиллари ислом илмий меросини ўрганишнинг замонавий ёндашувларини муҳокама қилади.

Нуфузли анжуман доирасида Ўзбекистон ва Малайзиянинг етакчи илмий-таълим муассасалари, хусусан, Малайзия технология университети ҳамда Ўзбекистон халқаро ислом академияси, Имом Бухорий ва Имом Мотуридий халқаро илмий-тадқиқот марказлари ўртасида ҳамкорлик меморандумлари имзоланади.

Тадбирнинг муҳим қисми сифатида Малайзия томони “Nasyrul Qur’an” марказида нашр этилган 20 000 нусха Қуръони каримни юртимизнинг “Вақф” хайрия жамоат фондига ҳадя қилади.

Ўз навбатида, Малайзия Қироличаси Раджа Зарит Софияга “Малайзия Ислом санъати музейи тўплами” номли махсус китоб-альбом тақдим этилади.

Конференция якунида хорижлик экспертлар ва меҳмонлар учун Ислом цивилизацияси маркази экспозициялари бўйлаб экскурсия ҳамда Самарқанд ва Бухоро каби тарихий шаҳарларимизга маданий-илмий зиёратлар ташкил этилади.

Мазкур тадбир нафақат икки давлат алоқаларини, балки бутун ислом оламида илм-фан ва маънавият бирлигини мустаҳкамлаш йўлида муҳим қадам бўлиб хизмат қилади. 

Ўзбекистон мусулмонлари идораси
Матбуот хизмати