Ҳадис илми мактабининг 2-босқич талабалари буюк муҳаддис Имом Абу Исо Муҳаммад ибн Исо Термизийнинг машҳур «Сунани Термизий» асарини муваффақиятли тамомлаб, ушбу муборак илм силсиласининг ижозаларини (шаҳодатномаларини) қўлга киритдилар.
Китобнинг якуний хатм тадбири рамзий маънода Термиз шаҳрида, Имом Термизий раҳматуллоҳи алайҳ қўним топган табаррук зиёратгоҳда бўлиб ўтди. Унда институт ўқитувчиси, доктор Салоҳ Исо ҳамда Ҳадис кафедраси мудири Маҳмуджон домла Абдураҳмонов сўзга чиқиб, ҳадис илмининг фазилати ва муҳаддислар меросини ўрганишнинг аҳамияти ҳақида қимматли фикрлар билдирдилар.
Хатм жараёнида фан ўқитувчилари Бекназар Муҳаммад Шакур ва Абдулҳай Хушвақтов «Сунани Термизий» китобининг сўнгги ҳадисларини шарҳлаб, талабаларга илмий ва тарбиявий тавсиялар бердилар.
Эътиборлиси, тадбир давомида келгуси ўқув йилида ушбу асарни ўқиши режалаштирилган 1-босқич талабалари ҳам китобни бошлаб беришди. Шу тариқа, илм силсиласи узилмасдан давом этиб, бир гуруҳ китобни хатм қилган бўлса, янги авлод уни ўрганишга киришди.
Aллоҳ таоло ушбу муборак китобдан олинган илмларни манфаатли қилиб, муҳаддислар меросини келгуси авлодга етказиш йўлидаги хизматларни баракали қилсин!
Ўзбекистон мусулмонлари идораси
Матбуот хизмати
Юртимиз диний соҳа вакилларининг хорижда, хусусан, Россия Федерациясида меҳнат қилаётган ватандошларимиз билан учрашувлари, уларнинг ижтимоий-маънавий ҳаётидан хабар олиш ва диний эҳтиёжларини қондириш борасидаги хайрли ишлари тизимли равишда давом эттирилмоқда.
Сафар дастури доирасида Ленинград вилояти Кингисепп туманида жойлашган "RENCONS Heavy Industries" компаниясида фаолият юритаётган мингга яқин ватандош ишчи-ходимлар билан биргаликда муборак жума намози адо этилди. Намоздан сўнг ҳамюртларимиз билан самимий суҳбат қурилиб, уларга мусофирчилик одоби, ҳалол меҳнат ва Ватан соғинчи ҳақида гўзал мавъизалар қилинди.
Шунингдек, ишчи гуруҳнинг Калининград шаҳрига ташрифи ҳам сермазмун учрашувларга бой бўлди. Жумладан:
Шаҳардаги маҳаллий «Нур» мусулмонлар диний ташкилотида пешин намозидан сўнг ватандошлар билан учрашув ташкил этилди;
Муҳташам «Эҳсон» жоме масжидида шом намози адо этилиб, йиғилган ҳамюртларимиз иштирокида навбатдаги маърифий суҳбат ўтказилди. Унда мусофир юртда иймон-эътиқод ва миллий қадриятларни асраш, ёт ғоялардан йироқ бўлиш зарурлиги алоҳида таъкидланди.
Шу билан бирга, Санкт-Петербург шаҳрида турли соҳаларда меҳнат қилаётган ватандошларимиз билан ҳам бир нечта манзилларда юзма-юз учрашувлар уюштирилди. Учрашувлар давомида ҳамюртларимизни қизиқтирган шаръий саволларга батафсил жавоблар берилиб, уларнинг ҳаққига, юртимиз тинчлиги ва осойишталигини сўраб хайрли дуолар қилинди.
Бу каби жонли учрашувлар ватандошларимизга улкан маънавий қувват бахш этмоқда.
Ўзбекистон мусулмонлари идораси
Матбуот хизмати