Sayt test holatida ishlamoqda!
10 Iyun, 2025   |   14 Zulhijja, 1446

Toshkent shahri
Tong
03:05
Quyosh
04:50
Peshin
12:28
Asr
17:37
Shom
19:59
Xufton
21:36
Bismillah
10 Iyun, 2025, 14 Zulhijja, 1446

Tayinlov: Fazilatli ulamo Salohiddin domla Sharipov Diniy idora raisi maslahatchisi lavozimiga tayinlandi

03.05.2021   4616   3 min.
Tayinlov: Fazilatli ulamo Salohiddin domla Sharipov Diniy idora raisi maslahatchisi lavozimiga tayinlandi

Toshkent shahri “Hazrati Ali” jome masjidi imom-xatibi Salohiddin domla Sharipov O'zbekiston musulmonlari idorasi raisi maslahatchisi lavozimiga tayinlandilar. Tabarruk ustoz ko'p yillardan buyon muborak dinimiz rivoji, xalqimiz ma'naviyati va yoshlar tarbiyasida salmoqli ishlar qilib kelayotgan taniqli din peshvolaridan biridir.

Zabardast ulamo Salohiddin domla Sharipov 1961 yilda Toshkent viloyatida tavallud topganlar. 1979-1983 yillarda Mir Arab madrasasida ta'lim oldilar va madrasa talabalari orasidan saralanib, Toshkent islom oliy ma'hadiga o'qishga kiradilar.

Oliy Ma'hadda har bir fanga alohida e'tibor bilan diniy bilim bilan bir qatorda dunyoviy ilmlarni ham puxta egallab, 1987 yilda tamomladilar. Shu yil u kishi Mir Arab madrasasiga o'qituvchi vazifasiga ishga qabul qilindilar va ustozlardan o'rgangan ilmiy merosni talabalarga berdilar. Naxv, sarf, tafsir fanlaridan dars berdilar. 1989 yil esa Toshkent islom institutiga o'qituvchi etib tayinlandilar, 1990 yilga qadar talabalarga tafsir, balog'at fanlaridan saboq berdilar.

1990 yilda Salohiddin domla ilk diniy ta'lim olgan Buxoro shahridagi Mir Arab madrasasida direktor lavozimiga tayinladilar. U erda 1993 yilga qadar madrasaning ilmiy saviyasini oshirish yo'lida ko'p ishlarni amalga oshirdilar. So'ng yana Toshkent islom institutida prorektor lavozimida faoliyat olib bordilar.

1996 yilda Toshkent shahar Uchtepa tumanida joylashgan “Hazrati Ali” jome masjidiga imom-xatib etib tayinlandilar. Shu bilan birga Oliy Ma'hadda tafsir fanidan dars berdilar.

Hozirga kunda ham Salohiddin domla “Hazrati Ali” jome masjidida imomlik vazifasini bajarmoqdalar. O'zlarining diniy-ma'rifiy, axloqiy-tarbiyaviy ma'ruzalari bilan xalqimiz ma'naviy kamolotiga juda katta hissa qo'shmoqdalar. Shu bilan birga Salohiddin domla O'zbekistonda amalga oshirilayotgan islohotlar mohiyatini chuqur anglab, mazmun-mohiyatini o'z ma'ruzalarida keng xalq ommasiga etkazmoqdalar.

Fazilatli olim o'zining ko'p yillik mehnat faoliyati davomida o'nga yaqin elektron disklar va kitoblar nashr qildilar. Jumladan, “Inson mukarram zot”, “Islomda oilaga munosabat” kabi asarlar va “Saodat ulug' ne'mat”, “Mazhabboshimiz No''mon ibn Sobit hayoti va faoliyati”, “Mustahkam oila yurt tayanchi”, “Duo odoblari va islom ruknlarining tarbiyaviy axamiyati”, “Qur'on, namoz va Ramazon fazilatlari”, “Juma ma'ruzalaridan namunalar” kabi disklari muxlis xalqimiz tomonidan mamnuniyat ila tinglab mutolaa qilinmoqda.

Alloh taolo Salohiddin domla Sharipovga yangi sharafli martabani muborak aylasin, ish faoliyatlarida ulkan muvaffaqiyatlarni ato etsin.

 

O'zbekiston musulmonlari idorasi matbuot xizmati

O'zbekiston yangiliklari
Boshqa maqolalar

Qalbingizni zabonsiz toshga aylantirib qo‘ymang.

09.06.2025   2974   4 min.
Qalbingizni zabonsiz toshga aylantirib qo‘ymang.

Har yangi kunning tongini ko‘rganingizda qalbingizni zikr ila to‘ldiring. Iymon zikrlariga quloq tutar ekansiz, borliq Yaratgan Zot sari talpinayotganini his qilasiz. Alloh taolo aytadi: «...Mavjud bo‘lgan barcha narsa hamd bilan Unga tasbeh aytur...»[1]. Balki uyda, balki ko‘chada, qayerda bo‘lsangiz-da, Allohning zikriga shoshiling. Zikrlarni ko‘paytirganingiz sari Allohga bo‘lgan muhabbatingiz ortib boradi, osmonlaru yerning Xoliqi bo‘lgan Alloh taolodek buyuk Zot suyanchig‘ingiz ekanini anglaysiz...

Ushbu misralarni doim yodda tuting:

Gar ersa qalblar Xoliqin zikridin mosuvo,
Alar jasad ichidin joy olgan tosh kabi go‘yo.

Qalbingizni zabonsiz toshga aylantirib qo‘ymang.
Toshda na mehr va na his bor. Payg‘ambarimiz sollallohu alayhi vasallam: “Robbini zikr qiladigan bilan zikrdan yiroqda bo‘lgan kishi xuddi tirik bilan o‘lik kabidir” [2],  deganlar.

Yana Nabiy alayhissalom: “Sizlarga amallaringizning eng xayrlisi va Sultoningiz huzurida eng pokiza, darajangizni yuqorilatadigan, sizlar uchun tillo-kumushlarni ehson qilgandan-da, dushmaningizga yo‘liqib, uning boshini tanasidan judo qilishingiz, u ham sizning kallangizni bo‘yningizdan uzib tashlashidan-da yaxshiroq amal qaysi ekanini bildirib qo‘yaymi?!” dedilar. Sahobalar: ”Ha, ey Allohning Rasuli”, deyishdi. U zot: U Allohning zikridir”,3] dedilar.

Ubayd ibn Umayr aytadilar: “Mo‘minning amal daftaridagi hamd ila tasbeh – u bilan dunyo tog‘laricha tillo sudralib yurishidan xayrlidir”.

Nabiy alayhissalom yana boshqa bir hadisda: «Alloh taoloning fazilat izlab kezib yuruvchi farishtalari bo‘lib, ular zikr aytib o‘tirilgan davralarni izlab yurishadi. Shu asnoda zikr bo‘layotgan davrani topishsa, farishtalar zikr halqasidagilar bilan birgalikda o‘tirishadi va bir-birlarini qanotlari bilan o‘rab olishadi, shu tarzda zikrdagi kishilar bilan dunyo osmonining orasi farishtalar bilan to‘lib ketadi. Zikr halqasidagi kishilar tarqalib ketishsa, farishtalar osmonga ko‘tarilib ketishadi.

Keyin Alloh taolo hammasini bilib turgani holda, ulardan: “Qayerdan keldinglar? – deb so‘raydi. Ular: “Biz yerdagi bandalaring oldidan keldik. Ular Senga tasbeh aytyaptilar, takbir, tahlil aytib, Senga maqtov yo‘llayaptilar va O‘zingdan so‘rashyapti”, deb javob qaytarishadi.

Alloh taolo: “Ular Mendan nimani so‘rayapti?” – dey­di. Farishtalar javoban: “Sendan jannatingni so‘rashyapti”, deyishadi.  Alloh taolo: “Ular jannatimni ko‘rishganmi?” – deya farishtalardan yana savol so‘raydi. Farishtalar javob berib: “Yo‘q! Ey Yaratgan Zot!” – deyishadi. Alloh subhanahu va taolo yana: “Mabodo ular jannatimni ko‘radigan bo‘lsalar, holat qanday bo‘ladi-ya?” – deydi. Farishtalar: “Ular yana Sendan panoh tilashyapti”, deyishadi. Alloh taolo savol tariqasida: “Nimadan panoh berishimni so‘rashyapti?” – deydi.

Ular: “Jahannamingdan, ey Yaratgan Zot!” – deb javob qaytarishadi. “Ular do‘zaximni ko‘rganmi?” – deb so‘raydi Alloh taolo. Javob qaytarib: “Yo‘q!” – deyishadi ular.

Alloh taolo: “Ular do‘zaximni ko‘rishsa qanday bo‘larkin?” – deydi.

Farishtalar: “Ular yana Sendan mag‘firat qilishingni so‘rashyapti”, deyishadi.

Alloh taolo: “So‘zsiz ularning gunohlarini kechirdim, ularga so‘rovlarini ato etdim va panoh tilagan narsalaridan ularni O‘z panohimga oldim”, deydi.

Farishtalar: “Ey Yaratgan Zot! Ular orasida falonchi, o‘ta xatokor qul ham bor. U o‘tib keta turib ularning oldiga o‘tirib oldi”, deyishadi. Alloh taolo shunday deya marhamat qiladi: “Uni ham kechirdim! Ular hammajlislari badbaxt bo‘lmaydigan kishilardir”, deydi»[4]dedilar. 

 


[1]  Isro surasi, 44-oyat.
[2]  Imom Muslim rivoyati.
[3]  Imom Termiziy rivoyati.
[4]  Imom Muslim rivoyati.