O'zbekiston musulmonlari idorasi va “Vaqf” fondi poytaxtimizdagi “Shayx Muhammad Sodiq Muhammad Yusuf” majmuasida gapirish va eshitish imkoniyati cheklangan yurtdoshlarimiz o'rtasida “Asmaul husna” (Allohning go'zal ismlari) ni aytish bo'yicha musoboqasini o'tkazdi.

Tadbirda O'zbekiston musulmonlari idorasi raisi o'rinbosari Ibrohimjon domla Inomov, “Vaqf” xayriya jamoat fondi rahbari Yahyo domla Abdurahmonov, “Shayx Muhammad Sodiq Muhammad Yusuf” jome masjidi imom noibi Hasanxon qori Yahyo Abdulmajid, Hayrulloh hoji Akromov, Diniy idora xodimasi Munira Abubakirova, Toshkent shahar hokimiyati vakilasi Dilbar Ahmedova va Toshkent shahar bosh otinoyisi Zulayho Soatovalar qatnashdi.

An'anaga muvofiq anjuman Qur'oni karim tilovati va xayrli duolar bilan boshlandi. Dastlab erkaklar, so'ng ayol-qizlar o'rtasida saralash musobaqasi bo'lib o'tdi. Ularning chiqishlarini jamoatchilik vakillaridan iborat hakamlar hay'ati baholab bordi.

Erkaklar musobaqasi yakuniy natijasi quyidagicha bo'ldi:
1-o'rin: Nosirjon Komilov;
2-o'rin: Mirzohid Komilov;
3-o'rin: O'tkirbekka Karimovga nasib etdi.

Ayol-qizlar o'rtasidagi bahslarda esa bunday natija qayd etildi:
1-o'rin Ra'no Unbayeva;
2-o'rin Nargiza Shermatova;
3-o'rin Dildora Toirova sohibalari bo'lishdi.

G'olib, sovrindor va ishtirokchilarga “Vaqf” xayriya jamoat fondining qimmatbaho mukofotlari, esdalik sovg'alari topshirildi.

Musobaqa davomida imkoniyati cheklangan yurtdoshlarimizning “Asmaul husna” (Allohning go'zal ismlari)ni bir-biridan go'zal tarzda yoddan chiroyli aytishlari, ular ijrosidagi go'zal salovat va nashidlar ishtirokchilarni quvontirdi, qalblarini to'lqinlantirdi.

Alloh taolo ushbu yurtdoshlarimizning iymonu ixlosini ziyoda qilsin, qilayotgan amallariga ajrlarni yanada ko'paytirib bersin, barchamizni sihat-salomatlikning qadriga etib, ibodatu yaxshiliklarda bardavom bo'lishimizni nasib aylasin!

O'zbekiston musulmonlari idorasi matbuot xizmati