Kun yorug'ligidagi zamonaviy, keng masjid. Farg'ona viloyati Oltiariq tumanida yangidan qurilayotgan «Oq do'ppi eshon» jome masjidi asosiy xonaqohi balandligi 20 metrga yaqin bo'lib, derazalarining balandligi va ko'pligi bilan yanada yorug' va keng ko'rinadi. Loyihaga ko'ra, 4 tomondan  30 metrlik minora 4 ta kichik gumbaz ustiga qurilgan katta gumbazni qurshab turadi. Ichki tomondan esa to'rt tomondagi nafis qubbalar xonaqohga o'zgacha go'zallik bag'ishlab qolmay, muayyan vazifalarni ado etadi. Bir vaqtlar bunday masjidlar viloyatlar aholisi uchun orzu edi. Ming shukurki, bugun omonlik zamonasida mehnatsevar xalqimiz munosib shart-sharoitlar asosida yashash, ibodat qilish imkoniyatiga ega bo'lmoqda.

Yaqinda qurilishi boshlab yuborilgan masjid poydevoriga g'isht qo'yish marosimi bo'lib o'tdi. Unda Farg'ona viloyati bosh imom-xatibi Ubaydulloh domla Abdullayev, imom-xatiblar va mahalla faollari qatnashdilar. Ezgu niyat va ixlos ila xayrli tashabbusga xizmat qilayotgan kishilar haqlariga duolar qilindi. 

Qapchig'ay mahallasi va qo'shni mahalla aholisi uchun torlik qilayotgan ushbu masjidning eski binosi 300-400 kishini sig'dirgan bo'lsa, yangi qad rostlayotgan masjidning katta xonaqohida 3000 ga yaqin, er to'la qismida esa yana 2500 kishi ibodat qilishi mumkin. Shuningdek, zamonaviy tahoratxona va ma'muriy binolar ham qulay imkoniyatlar asosida barpo etilishi rejalashtirilgan. 

Alloh taolo baytining obodligi yo'lida qilinayotgan har bir harakatga O'zi barakotlar ato etsin, masjid tez orada qad ko'tarib, xalqning quvonchiga, iymon va ma'rifatining yuksalishiga sabab bo'lsin!   

O'zbekiston musulmonlari idorasi Masjidlar bo'limi