Bugungi kunning dolzarb mavzularidan biri bu – ijtimoiy tarmoqlarda guruh (profil, gruppa, kanal, bot, sahifa va hokazo) ochish masalasi. Bu masalada o'ta nozik va hushyor bo'linmasa, inson vafot qilgandan keyin ham savob yoki gunohi bu guruhni tuzib, tashkil qilganlarga yozilib turaveradi. Chunki gohida tekshirilmagan xabar yoki gumonga asoslangan mavzu fitna va gunohga sabab bo'ladi. Ayniqsa, hozirda turli xil nomlar bilan tashkil qilingan guruhlarda musulmonlarning sha'niga munosib bo'lmagan, masalan birovni ustidan kulish, fahsh va unga targ'ib qiluvchi materiallar (maqola, audio, video yoki suratlar)ni tarqalishi, tarqatilishi odat tusiga aylanib bormoqda. Masalaning nozik jihatidan biri, buni qancha odam ko'rsa, eshitsa, o'qisa gunohkor bo'lishlaridan tashqari shundan kamaytirilmagan holda shu ishni amalga oshirayotgan tashkilotchilarining ham nomalariga shuncha gunoh hatto vafot etganidan keyin ham yozilib boraveradi. Hadisi sharifda shunday ogohlantiriladi: “Kim bir yomon odatni joriy qilsa, unga u (o'sha ish)ning va amal qilganlarning ham gunohi yozilur”.

Afsuski, bugun biz shunchalar g'aflatga botib, din va ma'rifatdan yiroqlashdikki, buni diniy-ma'rifiy saytlar yoki shu mazmundagi ijtimoiy tarmoqlar, telegram kanallardagi kuzatuvchilar sonining kamligidan ham ko'rish mumkin. Ammo turli “prikollar”, ko'ngilochar guruh yoki kanallar “odam bilan to'lgan”. Eng yomoni, keraksiz, behuda narsalar bilan ovora bo'lish kishini umrini zavoli, asosiysi esa, bu holat insonni oxir-oqibat iymonidan ajralib qolishiga sabab bo'ladi. Alloh taolo Qur'oni karimda shunday marhamat qiladi:

“Endi er yuzida nohaqdan mutakabbirlik qilayotganlarni, barcha oyatlarni ko'rsalar ham, ularga iymon keltirmayotganlarni, to'g'rilik yo'lini ko'rsalar ham, uni o'zlariga yo'l tutmayotganlarni, agar adashuv yo'lini ko'rsalar, uni o'zlariga yo'l tutayotganlarni O'z oyatlarimdan buraman. Bunday bo'lishi ularning oyatlarimizni yolg'onga chiqarishlari va ulardan g'ofil bo'lishlari sababidandir”(A'rof surasi, 146 oyat).

Bugun yoshlarimiz o'z dinlarini ishonchli manbalar (sayt, profil, gruppa, kanal, bot, sahifa, telegram kanal-guruhlar va hokazo)dan foydalanib, kishini dunyo va oxirat yaxshiligi, ilm-ma'rifatga etaklovchi guruh yoki kanallarni ko'rib turib kirmasalar, buning o'rniga lag'v, fahsh, asossiz xabar tarqatuvchi yoki “prikol” va masxarabozlikni targ'ib qiluvchi guruhlarni ko'rib, darhol unga a'zo bo'lish –gunoh sanaladi. Yuqorida keltirilgan “O'z oyatlarimdan burib qo'yaman” oyati hamda buni tafsir qilgan Alloma Qurtubiyning tafsirlaridan shuni anglash mumkin. Shunday ekan, qanaqa kanal, guruh, sahifalarni kuzatyapsiz, o'zingiz bilan hisoblashib qo'ying!

Yunusxon MAMARASULOV,
Marg'ilon shahar “Said Jalolxonto'ra” masjidi imom-xatibi