Bismillahir Rohmanir Rohiym

Alloh taologa beadad hamdu sanolar, Rasululloh sollallohu alayhi vasallamga durudu salavotlar bo'lsin.

Abu Bakr Siddiq roziyallohu anhu

Abu Bakr roziyallohu anhuning ayoli Asmo binti Umays roziyallohu anho aytadilar: “Rasululloh sollallohu alayhi vasallam vafot etganlariga bir kun bo'lgan edi. Abu Bakr Siddiq roziyallohu anhu Rasululloh sollallohu alayhi vasallamni bir kun ko'rmaganlariga boshlarini tizzalariga qo'yib ko'p yig'lardilar”. Shunda tinchlantirish maqsadida: “Ko'p tashvish chekmang! Hamisha Rasululloh sollallohu alayhi vasallam bilan birga bo'ldingiz. Inshaalloh, yaqinda U zot alayhissalom bilan yana ko'rishasiz”, dedim.

Abu Bakr Siddiq roziyallohu anhu Rasululloh sollallohu alayhi vasallam qattiq sog'inar, u zot alayhissalom bilan ko'rishishni intizorlik bilan kutardilar.

Rasululloh sollallohu alayhi vasallamni ko'rishga bo'lgan sog'inch ikki yilu uch oy davom etdi. Abu Bakr Siddiq roziyallohu anhu vafot etdilar. Sog'inib kutganlari – Rasululloh sollallohu alayhi vasallam bilan uchrashishga muvaffaq bo'ldilar...

Fotimai Zahro roziyallohu anho

Rasululloh sollallohu alayhi vasallam og'ir betob bo'lib yotardilar. Qizlari Fotimai Zahro roziyallohu anho U zotning oldilariga kirdilar. Otalarini bu ahvolda ko'rib yig'ladilar. Shunda Rasululloh sollallohu alayhi vasallam: “Ey Fotima yaqinroq kel”, dedilar. U zot sollallohu alayhi vasallam qizlarining qulog'iga bir narsalarni aytdilar. Fotimai Zahro roziyallohu anhoning yig'ilari yanada kuchaydi. So'ngra boshqa qulog'iga yana bir narsalarni aytdilar. Bu safar Fotimai Zahro roziyallohu anho tabassum qildilar.

Rasululloh sollallohu alayhi vasallamning vafotlaridan keyin Fotima roziyallohu anhodan otalari nima deganlari haqida so'rashganda: “Birinchi gal shu kuni vafot etishlari haqida gapirdilar. Ikkinchisida esa, menga ahlimdan birinchi bo'lib sen etishasan dedilar”, deb javob berdilar.

Ha, Fotima roziyallohu anhoning ko'ngillariga faqatgina U zotga birinchilardan bo'lib etishish taskinlik berardi. Payg'ambarimiz sollallohu alayhi vasallamni sog'inib o'tgan olti oydan so'ng Fotima roziyallohu anho Rasululloh sollallohu vasallam bilan yana uchrashdilar.

Bilol ibn Raboh roziyallohu anhu

Bilol roziyallohu anhu o'lim to'shagida yotardilar. Ayoli: “Qanday qayg'uga botdik!” deb mahzun bo'lardi. Buni eshitgan Bilol o'lim talvasasidan turib: “Qayg'u dema, xursandchilik degin. Chunki ertaga do'stlarim – Muhammad alayhissalom va u zotning sahobalari bilan uchrashaman”, dedi.

O'lim to'shagida yotgan Bilol roziyallohu anhu Rasululloh sollallohu vasallam bilan uchrashishga oshiqardilar.

Rasululloh sollallohu alayhi vasallam esa ummatlarini ko'rishga mushtoqlar

Kunlarning birida Rasululloh sollallohu alayhi vasallam sahobalar roziyallohu anhum bilan birga Baqi' qabristoniga kirdilar. Shunda u zot alayhissalom:

– Do'stlarimni ko'rishni juda xohlayman, – dedilar.

Sahobalar roziyallohu anhum:

– Yo Rasululloh, Biz sizning do'stlaringiz emasmiz-mi? – deyishdi.

Rasuli akram sollallohu alayhi vasallam:

– Sizlar mening ashoblarim (birodarlarim)sizlar. Do'stlarim esa, mendan keyin keladigan, meni ko'rmay turib, menga imon keltiradigan qavmdir, – dedilar.

Unutmang! Rasululloh sollallohu alayhi vasallam biz ummatlarini ko'rishga juda mushoqdirlar. Ammo biz Rasululloh sollallohu alayhi vasallamga munosib ummat bo'lyapmiz-mi?

Alloh taolo qalbimizni Rasululloh sollallohu alayhi vasallamga bo'lgan muhabbatga to'ldirsin, u zot alayhissalomga munosib ummat bo'lishimizga tavfiq ato etsin!

Davron NURMUHAMMAD