Hech shak-shuhbasiz, har qanday yosh bola xato qiladi. Ba’zan noto‘g‘ri ish qiladi. Axir u bola-ku. Ammo ko‘pchiligimiz bolalarning xatosini qabul qila olmaymiz. Farzandimiz yoki boshqalarning farzandining xatolaridan qattiq g‘azablanamiz. Ba’zilar hatto farzandini kaltaklaydi, uradi. Ammo, unutmangki! Alloh toalo yosh bolalarni hisob-kitob qilmaydi.

Kunlarning birida Rasululloh sollallohu alayhi vasallam xurmo daraxtiga tosh otayotgan bolalarning oldidan o‘tib qoldilar. Shunda u zot sollallohu alayhi vasallam: "Bolalarim, daraxtga tosh otmang! Chunki bu bilan daraxtga ham, odamlarga ham ziyon yetkazasiz. Lekin yerga tushgan xurmolarni terib, yeng. Alloh sizning qorningizni to‘ydirsin", dedilar.

Qarang, Rasululloh sollallohu alayhi vasallam go‘zal xulqni o‘rgatdilar, yomonlikdan qaytardilar va ularning haqiga duo qildilar.

Davron NURMUHAMMAD