Joriy yilning 8 sentyabr' kuni O'zbekiston Respublikasi Bosh vazirining o'rinbosari S.Umurzakovning Malayziya Bosh vazirining birinchi o'rinbosari - xalqaro savdo va sanoat vaziri Moxamed Azmin Ali bilan videokonferentsiya shaklida muzokaralari bo'lib o'tdi.

O'zbekiston Respublikasi Investitsiyalar va tashqi savdo vazirligi matbuot xizmati xabariga ko'ra, suhbat chog'ida ikki mamlakat Hukumatlari tomonidan koronavirus pandemiyasi tarqalishiga qarshi kurashish va iqtisodiyotga ta'sirini kamaytirish bo'yicha amalga oshirilayotgan chora-tadbirlar bilan birga qo'shma loyihalar va tashabbuslarni amalga oshirish, shuningdek, investitsiya, savdo-iqtisodiy, transport-logistika, madaniy-gumanitar va turizm sohalaridagi hamkorlikni yanada kengaytirish istiqbollari muhokama qilindi.

Tomonlar ikki mamlakat mahsulotlar etkazib beruvchilari va buyurtmachilari o'rtasida mustahkam aloqalar o'rnatish orqali o'zaro savdo hajmini yanada oshirishga bo'lgan qiziqishlarini qayd etdilar. Savdo bo'yicha Qo'shma savdo qo'mitasinining yig'ilishini o'tkazish maqsadida Malayziya Halqaro savdo va sanoat vazirligi bilan O'zbekiston Respublikasi Investitsiyalar va tashqi savdo vazirligi sa'y-harakatlarini birlashtirish bo'yicha kelishuvga erishildi. Qo'mita yig'ilishi doirasida ikki mamlakatning kimyo, qishloq xo'jaligi, oziq-ovqat, to'qimachilik va elektrotexnika tarmoqlarining etakchi kompaniyalari ishtirokida O'zbekiston-Malayziya biznes-forumi o'tkaziladi.

Savdoni raqamlashtirish sohasida Malayziyaning tajribasini jalb qilish istiqbollari ta'kidlandi - shu nuqtai nazardan, “Consumption Union” kompaniyasining “CU Rewards” elektron savdo maydonchasi mahalliy eksportchilarga o'z mahsulotlarini Janubiy - Sharqiy Osiyodagi iste'molchilarga sotish imkonini beradigan samarali mexanizm bo'lib xizmat qilishi mumkin.

Shuningdek, Malayziya islom taraqqiyoti departamenti (JAKIM) va “O'zstandart” agentligi hamkorligida O'zbekistonda halol mahsulotlar ishlab chiqarish bo'yicha ilg'or tajriba Markazini tashkil etish rejalari muhokama qilindi. Markazning tashkil etilishi Respublikada Malayziyaning ilg'or tajribasi asosida halol mahsulotlar ishlab chiqarishni joriy etishga, shuningdek, o'zbek eksport qiluvchilariga Janubiy – Sharqiy Osiyo va Yaqin Sharq bozorlariga hamda ishlab chiqaruvchilar mazkur sertifikatga ega bo'lishlari majburiy bo'lgan boshqa mamlakatlarning bozorlariga chiqish imkonini beradi.

Mamlakatlar o'rtasida kimyo sanoati, ta'lim, axborot texnologiyalari va oziq-ovqat sanoati sohalariga investitsiyalar kiritish bo'yicha hamkorlikning ulkan istiqbollari belgilab olindi. O'zbekistonda amalga oshirilayotgan loyihalar bilan bog'liq masalalar ham muhokama qilindi - masalan, Horazm viloyatidagi “Hazorasp” EIZ da 250 mln dollarga yaqin Malayziyaning “Serba Dinamik Group Berhad” kompaniyasining to'g'ridan-to'g'ri investitsiyalarini jalb qilgan holda kaustik soda va suyuq xlor ishlab chiqarishni tashkil etish loyihasi faol ravishda amalga oshirilmoqda.

Shuningdek, O'zbekistonda bir nechta Malayziya banklarining filiallarini ochish va Respublikada eksportga yo'naltirilgan loyihalarni moliyalashtirish hamda kichik va o'rta biznesni qo'llab-quvvatlashga qaratilgan banklararo hamkorlikni yo'lga qo'yish orqali bank-moliya sohasida hamkorlik qilishning yuqori salohiyati qayd etildi.

Islom bankchiligi sohasida Malayziyaning tajribasini joriy etish mexanizmlari va shu vaqtning o'zida O'zbekiston bank sohasidagi xodimlari uchun ushbu sohada malaka oshirish kurslarini tashkil etish masalalari alohida ko'rib chiqiladi.
Ma'lumot uchun: Malayziya Islom moliyasining xalqaro markazi deb tan olingan, mamlakatda an'anaviy tizim bilan bir qatorda faoliyat ko'rsatayotgan islom bank tizimi joriy etilgan. Mamlakat hududida 27 ta mahalliy va xorijiy islomiy banklar mavjud. Islom moliyasi Malayziya bank sohasining 30 foiziga to'g'ri keladi.

Transport, logistika va turizm sohasida ikki tomonlama hamkorlik uchun katta imkoniyatlar mavjudligi qayd etildi. Shu nuqtai nazardan, xalqaro havo transporti orqali yuk tashishlarni tashkil etish, logistika havo xabini yaratish, shuningdek, O'zbekistonda Aviation Academy xalqaro standartlariga muvofiq uchuvchilarni tayyorlash Markazini ochish bo'yicha chora-tadbirlar muhokama qilindi.
Madaniy-gumanitar sohasidagi ikki tomonlama munosabatlarni rivojlantirish doirasida “MARA” texnologiyalar universiteti hamda Samarqand shahridagi “Ipak Yo'li” xalqaro turizm universiteti bilan amaliy hamkorlikni yo'lga qo'yish, shuningdek Horazm viloyatida “Binary” menedjment va tadbirkorlik universiteti filialining faoliyatini tashkil etish bilan bog'liq barcha masalalarni hal etish bo'yicha birgalikda amalga oshiriladigan harakatlar muhokama qilindi.
Videokonferentsiya yakunida muhokama qilingan va kelishilgan tashabbuslarni ilgari surish va amalga oshirish bo'yicha qo'shma ishchi guruhini tuzish to'g'risida kelishuvga erishildi.

O'zbekiston musulmonlari idorasi Matbuot xizmati