Joriy yilning 3 iyul' kuni O'zbekiston Respublikasi Vazirlar Mahkamasi huzuridagi O'zbekistondagi islom tsivilizatsiyasi markazida "Buyuk ajdodlar merosi – III Renessans poydevori" mavsusida O'zbekiston olimlari forumi bo'lib o'tmoqda.
Unda besh yuzga yaqin turli yo'nalishdagi ahli ilmlar, professoru olimlar, ulamolar, tadqiqotchilar ishtirok etmoqda. Forumda O'zbekiston Islom tsivilizatsiyasi markazining maqsad va vazifalar, kelgusi rejalarini namoyon etadigan seminarlar va taqdimotlar tashkil etilmoqda.
Sho''balarga bo'lingan holda o'tkazilgan forumda har bir loyiha bo'yicha olimlar ishtirokida muhokamalar tashkil etilib, ishtirokchilarning fikr-mulohazalari tinglanmoqda.
Forumdan asosiy maqsad O'zbekiston Respublikasi Prezidenti Shavkat Mirziyoevning bevosita tashabbuslari bilan barpo etilayotgan Markaziy Osiyoda yagona bo'lgan O'zbekistondagi Islom tsivilizatsiyasi markazini III Renessansning ma'naviy-marifiy ustunlaridan biriga aylantirish va uning faoliyati takomillashtirishga qaratilgan.
Shuningdek, ma'naviyat va ma'rifat sohasida ishlarni yangi yo'lga qo'yish, davlat Rahbari qarorlarida belgilangan vazifalarning samarali ijrosini ta'minlash, Islom tsivilizatsiyasi markazining faoliyatini yangi bosqichga olib chiqish, yangi ilmiy innovatsion loyihalarni amaliyotda joriy etish, Muzey ekspozitsiyasi kontentini yanada boyitish va takomillashtirish kabi masalalarni muhokama qilishdan iboratdir.
Forum ishi ertaga, 4 iyul' kuni davom etadi. 

O'zbekiston musulmonlari idorasi
Matbuot xizmati