Yaqindagina ramazonni boshlagan edik. Mana darrov yigirma kunni ham tamomladik. Endi bu yog‘i oxirgi o‘n kunlik. Yanada ogoh, yanada savobli ishlarga, ibodat qilishga qulay fursat. Chunki ramazon oyi tugab bormoqda. Qolaversa oldimizda ajri yanada ulug‘ bo‘lgan kunlar turibdi. Oxirgi o‘n kunlikda ming oyga teng bo‘lgan qadr kechasi bor. Payg‘ambarimiz Muhammad sollallohu alayhi vasallam ham bu kunlarni g‘animat bilar edilar. Oisha roziyallohu anhodan rivoyat qilinadi. “Nabiy sollallohu alayhi vasallam qachon (oxirgi) o‘n kunlik kirsa, belni mahkam bog‘lab, kechani tiriltirar va ahllarini uyg‘otar edilar”. (Beshovlari rivoyat qilishgan).

Imom Termiziy rivoyat qilgan hadisda esa: “Nabiy alayhissalom oxirgi o‘n kunlikda undan boshqa kunlarda qilmagan jiddu-jahdni qilar edilar”, deyilgan. Bundan ko‘rinib turibdiki bizlar shavqu-zavqni yana ham oshirib, ko‘proq savobga ega bolishimizga qulay fursat. Zero, Oisha roziyallohu anho onamizdan rivoyat qilingan boshqa bir hadisda: “Nabiy alayhissalom Qadr kechasini Ramazonning oxirgi o‘n kunligidan izlanglar”, deb aytardilar (Ikki shayx va Termiziy rivoyati). Ulamolar: “Nabiy alayhissalomning bunday deyishlariga sabab, insonlarni ko‘proq savobli, xayrli amallarni qilib olishiga targ‘ibdir”, deydilar.

Mana shunday kunlar oldimizda. Ramazon fazilatini ham, qadr kechasini ham topishdek baxt ostonamizda eshik qoqib turibdi. Ayniqsa, hozirgi karantin davrida oila-a’zolarimiz bilan birga bu kecha-kunduzlarni hadisdagidek o‘tkazishga yaxshi imkoniyat. Biz buni bajara olamizmi? Albatta bajara olamiz. Kunduzini ro‘za, kechasini yana ibodatda o‘tkazish bizning qo‘limizdan keladi. Chunki, biz yigirma kundan beri tanamizni bunga o‘rgatdik, tajriba hosil qildik. Shunday ekan endi also bo‘shashmaylik! Zero, ming oylik mukofot kimga kerak emas?!!

Yusufxon SHODIEV,

“HIDOYA" o‘rta maxsus islom bilim yurti

o‘qituvchisi