“Duxon” so‘zi “tutun” ma’nosini bildiradi.  Suraning 10-oyatida tutun haqida so‘z yuritilgan. Shuning uchun sura “Duxon” deb nomlangan.

Payg‘ambarimiz sollallohu alayhi va sallam: “Kim kechasi Duxon surasini o‘qisa, yetmish ming farishta tonggacha uning haqiga istig‘for aytib chiqadi”, deganlar (Imom Termiziy, Imom Bayhaqiy rivoyati).

Abu Hurayra roziyallohu anhudan rivoyat qilingan hadisi sharifda Duxon surasi aynan qaysi kechada o‘qilishi aytilgan: “Kim Duxon surasini juma kechasida o‘qisa, (gunohlari) mag‘firat etiladi” (Imom Termiziy rivoyati).

Abu Umoma roziyallohu anhudan rivoyat qilinadi. Rasululloh sollallohu alayhi va sallam: “Kim Duxonni juma kechasi yoki juma kuni o‘qisa, Alloh unga jannatda bir uy quradi”, dedilar (Imom Tabaroniy rivoyati).

Abdulloh ibn Iso rahimahulloh aytadilar: “Menga xabar qilinishicha, kim Duxon surasini juma kechasi – imon keltirgan, tasdiqlagan holda – o‘qisa, tong otganda gunohlari kechirilgan bo‘ladi”.