Ma’lumki, kuni kecha 5 mart kuni uzoq yillardan beri kuzatilmagan holat – Masjidul Haromning Ka’ba atrofidagi asosiy tavof qilinadigan sahnasi hamda Masjidun Nabaviy ichidagi Ravzai mutahhara vaqtinchalik yopib qo‘yilgan edi.

Bu holat koronavirusga qarshi kurash, virus tarqalishining oldini olish maqsadida tozalash ishlari boshlangani munosabati bilan amalga oshirilgani xabar berilgan. Ammo dindoshlarimiz masjidning ichida, ya’ni masjidning usti yopiq joylarida tavof-sa’ylarini amalga oshirib, namoz o‘qishmoqda. Ikki Harami sharifda ham bugun Jum’a namozi ado etildi. Ammo tozalash, dezinfeksiya ishlari yakuniga yetmagani uchun Ka’ba atrofidagi sahna hali ochilmadi.

Alloh taolo Masjidul Harom va Masjidun Nabaviyni hamda barcha umrachi, ziyoratchilarni O‘z panohida asrab, Ka’ba atrofidagi tavof qilinadigan sahna va Ravzai mutahharaning tezroq ochilishini nasib etsin! Shuning qatorida yurtimizni, xalqimizni ham turli kasalliklar va viruslardan O‘z panohida asrasin!

O‘zbekiston musulmonlari idorasi Matbuot xizmati