7 fevral kuni Nur-Sulton shahrida bo‘lib o‘tgan Qozog‘iston musulmonlari diniy boshqarmasining navbatdan tashqari ІX qurultoyida Qozog‘istonning Bosh muftiysi saylandi.
O‘zbekiston musulmonlari idorasi raisi, muftiy Usmonxon Alimov hazratlari Qozog‘istonning yangi bosh muftiysi Navro‘zbay hoji Tag‘an o‘g‘lini sharafli vazifa bilan qutlab, quyidagi tabrikni yo‘lladilar:
Hurmatli, Qozog‘iston musulmonlar diniy boshqarmasi raisi, Bosh muftiy Navro‘zbay hoji Tag‘an o‘g‘li hazratlari!
Sizni Qozog‘iston musulmonlari diniy boshqarmasi raisi, bosh muftiy etib tayinlanganingiz bilan chin qalbdan, samimiy muborakbod etaman. Ushbu sharafli vazifani ado etishingizda, Alloh taolodan Sizga kuch-quvvat va ulkan zafarlar tilayman.
Ma’lumki, xalqlarimiz azaldan bir zaminda yashab, bir daryodan suv ichgan. Og‘ir damlarda bir-biriga yordam qo‘lini cho‘zgan, hol-ahvol so‘ragan. Muhtaram Prezidentimiz ta’biri bilan aytganda: “O‘zbek va qozoq bir-biriga yelkadosh bo‘lib, ahl-inoq yashab kelgan ildizi bir xalqdir”. Buning yorqin misoli, Siz hurmatli Navro‘zbay hoji Tag‘an o‘g‘li hazratlarining bizning zaminda o‘qib, tahsil olganingizdir.
Yaratganga shukrki, so‘nggi yillarda mamlakatlarimiz o‘rtasidagi o‘zaro hamkorlik aloqalari yangi bosqichga chiqib, jadal rivojlanib bormoqda. Ikki davlat prezidentlarining bu yo‘ldagi sa’y-harakatlari tahsinga loyiq.
Shu o‘rinda, O‘zbekiston musulmonlari idorasi va Qozog‘iston musulmonlari diniy boshqarmasi o‘rtasidagi hamkorlik aloqalari mustahkamlanib borayotgani bizni yanada quvontirmoqda.
Biz din peshvolari xalqlarimiz orasidagi yaqin qo‘shnichilik va do‘stlik aloqalarini yanada rivojlantirishga hamda Islom dini ma’rifatini keng yoyishga bor kuchimizni safarbar etishimiz lozim, - deyiladi tabrik matnida.
O‘zbekiston musulmonlari idorasi Matbuot xizmati
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bugun, 13 mart kuni juma namozini Toshkent viloyati Qibray tumani “Baytqo‘rg‘on” jome masjidida ado etdilar.
Muftiy hazratlari namozdan oldin jamoatga muborak oyning oxirgi dahasini g‘animat bilish, bu damlardan unumli foydalanib qolish borasida go‘zal suhbat qilib berdilar.
Alloh taolo oxirgi o‘n kunlikni o‘ziga xos fazilat va lutfu ehsoni bilan sharafli qilganki, bunga boshqa kun va oylarda yetishishning iloji yo‘q. Payg‘ambarimiz alayhissalom ham boshqa oylarda qilmagan ba’zi amallarni shu oyda qilganlar.
Shayx Nuriddin Xoliqnazar hazratlari ushbu oxirgi o‘n kunlikda ibodatlarga yanada jiddu jahd bilan kirishish, vaqtni g‘animat bilish, Qadr kechasini izlash kabi amallarni sanab o‘tar ekan, ayniqsa, Qadr kechasida qilingan solih amal boshqa ming oyda qilingan amaldan yaxshiroq bo‘lishini oyati karima bilan keltirib o‘tdilar. Zero, Alloh taolo Qadr surasining 3-oyatida “Qadr kechasi ming oydan ham yaxshiroqdir” deb marhamat qilgan.
Ma’ruzada jamiyatdagi birlik, inoqlik, o‘zaro yordam va muhabbat asosida qarindoshlarga yaxshilik qilish yotishi ta’kidlandi. O‘zaro arazlashganlar bo‘lsa yarashishga chaqirildi.
Shuningdek, bu yilgi Ramazon oyi o‘zgacha shukuh va ko‘tarinki ruhda o‘tayotgani, buning asosiy sababi – Prezidentimizning bevosita tashabbuslari bilan keng ko‘lamli xayriya va ijtimoiy ko‘mak tadbirlarining amalga oshirilayotgani ekani e’tirof etildi.
Manfaatli suhbat so‘ngida Alloh taolo barchamizni ushbu g‘animat damlardan unumli foydalanib, O‘zining roziligiga erishadigan bandalaridan qilishini so‘rab duo qilindi.
O‘zbekiston musulmonlari idorasi
Matbuot xizmati