Qizaloqning qo‘llarida ikkita olma bor edi. Onasi undan “Qizim, olmaning bittasini menga ber” deb so‘radi. Qiz onasiga tikilib turdi-da, keyin qo‘lidagi olmalarni birin-ketin tishladi. Onasi qizining bu ishidan biroz xafa bo‘lib, “Mehr bilan boqqan qizim shunday qildiya” degan narsa xayolidan o‘tdi. O‘z qizidan bunday muomalani kutmagandi. Qizidan uzoqlashib, boshqa xonaga chiqmoqchi bo‘lganida, qizi uning ortidan chaqirdi va “Onajon, mana bunisi shirinroq ekan” dedi-da, olmalarning birini onasiga uzatdi.
Qizaloq onasiga shirin olma berish uchun ularni tishlab ko‘rgandi. Onasi esa bu holni biroz noto‘g‘ri tushundi va qizidan xafa bo‘la boshladi. Qizining gapidan keyin ona undan bekorga xafa bo‘lganini angladi.
Har qancha ilmli, tajribali va dunyoqarashi keng inson bo‘lmang, boshqalar haqida hukm chiqarishga shoshilmang. Odamlarga o‘z maqsadlarini bayon qilib berishlari uchun imkon bering.
Internet ma’lumotlari asosida Nozimjon Hoshimjon tayyorladi
Joriy yilning 17 yanvar kuni Jo‘ybori Kalon ayol-qizlar islom ta’lim muassasasida Buxoro viloyati bosh imom-xatibi o‘rinbosari Orif domla Amonov, xotin-qizlar masalalari bo‘yicha yordamchi Rizvon Baxromova hamda mas’ullar ishtirokida uchrashuv o‘tkazildi.
Uchrashuvda talabalarning ta’lim jarayoni va yashash sharoitlari ko‘zdan kechirilib, ularning ijtimoiy-ma’naviy ehtiyojlari muhokama qilindi. Shuningdek, talabalar bilim va salohiyatini yanada rivojlantirish masalalari yuzasidan takliflar bildirildi.
Homiylar ko‘magida muassasaning ayrim moddiy ehtiyojlarini qoplash bo‘yicha kelishuvga erishildi. Tadbir talabalarni qo‘llab-quvvatlashga qaratilgan muhim qadam sifatida baholandi.
O‘zbekiston musulmonlari idorasi
Buxoro viloyati vakilligi
Matbuot xizmati