TAHORAT QILISH TARTIBI 

1. Suv bilan (old va ma’qad) tozalanib bo‘lgandan so‘ng, tahoratga niyat qilgach, ko‘ngilda «Bismillahir rohmanir rohiym», deyiladi. 

2. So‘ng qo‘llar oshiqlari bilan uch marta yuviladi. Qo‘l barmog‘ida uzuk bo‘lsa, uni qimirlatib, o‘rniga suv yetkaziladi. 

3. O‘ng qo‘l kaftiga suv to‘ldirib, og‘izga olinadi va og‘iz g‘arg‘ara qilib chayi­ladi va tishlar barmoq yo misvok bilan ishqalanadi. So‘ng yana shu tartibda og‘iz ikki marta chayiladi. 

4. O‘ng qo‘l kaftiga suv to‘ldirilib burunga tortiladi, so‘ngra chap qo‘l bilan qoqiladi. Shu amal yana ikki marta bajariladi.
5. O‘ng qo‘l bilan, kaftiga suv to‘ldirilib, yuz uch marta yuviladi. 

6. O‘ng qo‘l tirsaklari bilan qo‘shib, ishqalab yuviladi. 

7. So‘ngra chap qo‘l tirsak­lari bilan qo‘shib, ishqalab yuviladi. 

8. Ikki qo‘lni ho‘llab o‘rta, nomsiz va kaftlar bilan boshning hamma qismiga mas'h tortiladi. 

9. Mas'h tortishda boshga tegmagan ikki qo‘lning ko‘rsatkich barmog‘i bilan ikki quloqning ichi, bosh barmoq bilan esa quloqlar orqasi mas'h qilinadi.
10. Qo‘llar ho‘llanib, ikki qo‘lning uch kichik barmog‘i orqasi bo‘yin tomiriga tekkizib olinadi. 

11. O‘ng oyoq to‘pig‘i bilan qo‘shib, chap qo‘lda ishqalab uch marta yuviladi. Birinchi yuvishdan so‘ng o‘ng oyoq panjalari orasi tagidan, jimjilog‘idan boshlab (chap qo‘l jimjilog‘i kiritilib) xilol qilinadi. 

12. Chap oyoq ham shu tarzda uch marta yuviladi. Ammo uning panjalari boshmoldog‘idan boshlab xilol qilinadi.

Tirnoqlarga, teriga (suv o‘tkazmaydigan) lak yoki bo‘yoqlar surilgan bo‘lsa, ularni ketkazib, so‘ng tahorat qilish kerak. Aks holda tahorat durust bo‘lmaydi.

Tahorat olayotganda gapirmaslik, ehtiyojdan ortiq suv ishlatmaslik, ust-boshga iloji boricha suv sachratmaslik kerak.

O‘MI matbuot xizmati