5 oktyabr, shanba kuni O‘zbekiston musulmonlari idorasi rahbar xodimlari va Toshkent shahar imom-xatiblari poytaxtimizning Shayxontohur tumani “Oqlon” mahallasida yong‘indan jabr ko‘rgan to‘rtta xonadon ahlidan xabar oldi.
Ulamolar va imom-domlalar aziyat chekkanlarga tasalli berib, bunday talofatda qilgan sabrlari ajru savoblarga noil bo‘lishini so‘zlab berdilar. Yong‘indan jabr chekkan xonadon ahllariga 100 million so‘mdan ziyod pul mablag‘lari topshirildi.
Shuningdek, ushbu xonadonlarga mahalla ahli astoydil yordam ko‘rsatayotgani, yong‘in bo‘lgan xonadonlarni qayta qurish ishlari hashar yo‘li bilan bajarilishiga e’tibor qaratish va ana shunday og‘ir damlarda mahalla ahlining ittifoqligi juda ham katta oliy fazilat ekani alohida ta’kidlandi.
Darhaqiqat, har bir banda hayoti davomida turli qiyinchilik va musibatlarga duch keladi. Zotan, bu hayotning o‘zi imtihon dunyosidir. Bu haqda Qur’oni karimda bunday xabar qilinadi: “Sizlarni biroz xavf-xatar, ochlik (azobi) bilan, molu jon va mevalar(hosili)ni kamaytirish yo‘li bilan sinagaymiz” (Baqara, 155).
Banda gohida yaxshilik bilan, ba’zida qiyinchilik bilan sinaladi. Abu Hurayra roziyallohu anhudan rivoyat qilinadi, Nabiy sollallohu alayhi va sallam: “Musulmonga qay bir musibat: charchashmi, bemorlikmi, tashvishmi, xafachilikmi, ozormi, g‘am-g‘ussami, hattoki, tikan kirishmi yetadigan bo‘lsa, albatta, Alloh ular ila uning xatolarini kafforat qilur”, dedilar” (Imom Buxoriy rivoyati).
O‘zbekiston musulmonlari idorasi raisi maslahatchisi Abduhakim qori Matqulov, Masjidlar bo‘limi mudiri Muhammadnazar Qayumov, Toshkent shahar bosh imom-xatibi Nuriddin domla Xoliqnazarov va Shayxontohur tumani “Shayx Zayniddin” jome masjidi imom-xatibi Yahyo Abdurahmonov, “Oqlon” jome masjidi imom-xatibi Sobir qori Rustamov shunday damlarda hamjihat bo‘lish haqiqiy mo‘min kishining sifati ekanini alohida ta’kidladilar.
Ulamolarning hol-ahvol so‘rab kelganidan taskin topgan mahalla ahli va xonadon egalari shunday og‘ir damlarda tashrif buyurganlari va ko‘ngillarini ko‘targanlari uchun minnatdorlik bildirdilar.

O‘zbekiston musulmonlari idorasi Matbuot xizmati